Աչաջրի համայնքապետի թեկնածուի վստահված անձի խնդրանքով ձայների վերահաշվարկ կատարվեց

Նոյեմբերյան քաղաքում տեղակայված թիվ 37 տարածքային ընտրական հանձնաժողովի նախագահ Գագիկ Աբովյանը հայտնեց, որ Աչաջուր համայնքի ղեկավարի թեկնածու, ՀՀԿ անդամ Տաթեւ Գասպարյանի վստահված անձը տարածքային ընտրական հանձնաժողով ներկայացրած դիմումով խնդրել է Աչաջրի ընտրական 2 տեղամասերից մեկում`37/03-ում քվեաթերթիկների վերահաշվարկ կատարել: Տարածքային ընտրական հանձնաժողովը նոյեմբերի 6-ին որոշել է այդ տեղամասի քվեաթերթիկների վերահաշվարկ կատարել:

Նշենք,որ նոյեմբերի 5-ին կայացած Աչաջուր համայնքի ղեկավարի ընտրությունների նախնական տվյալներով՝ անհատ ձեռներեց, ՀՀԿ անդամ 1978թ. ծնված Կարեն Ղալթախչյանը ստացել է 952 ձայն, 2013 թվականից Աչաջուր համայնքը ղեկավարող, ՀՀԿ անդամ,1957թ. ծնված Կամո Ղալթախչյանը`623, 1996-1999թթ. Աչաջուր համայնքը ղեկավարած, ՀՀԿ անդամ, 1967թ. ծնված Տաթեւ Գասպարյանը`557, Աչաջուր համայնքի ավագանու անդամ, ՀՅԴ անդամ, 1985թ. ծնված Սեւադա Ղուկասյանը`114 ձայն: Անվավեր քվեաթերթիկների թիվը կազմել է 38:

Սեւադա Ղուկասյանն իր մուծած 150 հազար դրամ ընտրական գրավը ետ ստանալու համար պետք է ստանար քվեարկությանը մասնակցած ընտրողների թվի 5 տոկոսի չափով քվեներ: Աչաջրում քվեարկությանը մասնակցել է 2284 ընտրող, որի 5 տոկոսը կազմում է 114.2: Ս. Ղուկասյանը քվեարկության արդյունքում ստացել է 114 քվե, նրան ընդամենը 0.2 տոկոս քվե չէր հերիքում իր մուծած ընտրական գրավը ետ ստանալու համար:

Նոյեմբերի 7-ին թիվ 37 տարածքային ընտրական հանձնաժողովում կատարվել է Աչաջրի 37/03 տեղամասում քվեաթերթիկների վերահաշվարկ:

Հանձնաժողովի նախագահ Գ. Աբովյանը հայտնեց, որ վերահաշվարկի արդյունքում Տաթեւ Գասպարյանի օգտին տրված քվեների քանակը մեկով նվազել է, Կարեն Ղալթախչյանի օգտին տրված քվեների թիվը`մեկով ավելացել, Սեւադա Ղուկասյանի օգտին տրված քվեների թիվը, ի հաշիվ նախկինում անվավեր ճանաչված քվեաթերթիկի, մեկով ավելացել է:

Ոսկան ՍԱՐԳՍՅԱՆ