Համայնքների խոշորացման արդյունքում Սյունիքի մարզի Սառնակունք բնակավայրը Գորայքի կազմում է ընդգրկվել։ Արդեն մեկ տարուց ավելի է այս համայնքները միավորվել են։ Տեղի բնակիչները «Փաստ» օրաթերթի հետ զրույցում ասացին, որ խոշորացումից հետո իրենց կյանքը չի լավացել։ Կուտակված խնդիրների մեծ մասն էլ դեռ լուծում չի ստացել։ Այստեղ օրակարգային հարցը ճանապարհների վերանորոգումն է։ Վերջերս, սակայն, այն մասամբ լուծվել է։ Մայրուղուց համայնք տանող ճանապարհը բարեկարգվել է։
«480 մետր ճանապարհ է միայն նորոգվել, բայց մնացածը նույն վիճակում է գտնվում»,- տեղեկացրին նրանք։
Սառնակունքի փողոցները քարուքանդ վիճակում են։ Մեքենաները դժվարությամբ են տեղաշարժվում։ Ձյունից եւ անձրեւից հետո էլ գյուղացիները տեղից տեղ շարժվել չեն կարողանում։
«Սաղ ցեխ է ու կեղտ, ամռանն էլ՝ փոշի։ էրեխեքը չեն կարողանում խաղալ, մաքուր հագցնում ես՝ ցեխ ու կեղտ են լինում»,- դժգոհեցին գյուղացիները։
Նրանք հույս էլ չունեն, որ մնացած փողոցները կբարեկարգվեն։ Տեղացիների խոսքով՝ կատարած աշխատանքով աչքակապոցի արեցին, իրենք կշարունակեն ցեխի ու փոշու հետ կռիվ տալ։
Հաջորդ լուծում չստացած խնդիրը խմելու ջրի որակն է։ Ջրի մանրազերծում չի կատարվում։ Մարդիկ այն օգտագործում են՝ չիմանալով ինչ որակի ջուր են խմում։
Մանյա ՊՈՂՈՍՅԱՆ
Հոդվածն ամբողջությամբ կարող եք կարդալ «Փաստ» թերթի այսօրվա համարում
