Պարտադիր ժամկետային զինծառայության տարկետման գործող կարգը չփոխելու պահանջով հիմնականում ԵՊՀ եւ պետական մի քանի այլ բուհերի պետպատվերով (անվճար) սովորող ուսանողների բողոքի ակցիաները երեկ շարունակվեցին:
Ի լրումն, ԿԳ նախարար Լեւոն Մկրտչյանը երեկ հանդիպեց բողոքող ուսանողների տասը հոգանոց պատվիրակությանը, եթե կարելի այդպես արտահայտվել: Այս հանդիպումն ամենից առաջ ուշագրավ է նրանով, որ նախօրեին, բողոքավոր ուսանողները չէին մասնակցել ուսանողության հետ պաշտպանության նախարար Վիգեն Սարգսյանի հետ հանդիպմանը: Մի բան, որ, մեղմ ասած, առնվազն տարօրինակ է:
Ըստ որում՝ բողոքի ակցիաների ակտիվ մասնակիցների, եթե ոչ՝ նախաձեռնողների հաջորդած բացատրությունները, թե՝ ինչու չեն գնացել, է՛լ ավելի տարօրինակ են հնչում:
Բայց, նախ, տեղի ունեցած հանդիպման մասին: ԿԳ նախարարը հարց էլ է ուղղել բողոքող ուսանողներին. «Հայրենիքի հանդեպ պարտականությունը բոլորի՞ համար է, թե՞ ոչ: Դուք միայն հետեւանքներից եք խոսում, խոսեք բովանդակությունից, նոր հետո սկսենք հասկանալ հետեւանքները»:
Ուսանողները նշել են, որ վստահության մթնոլորտի խնդիր կա նախարարության ու ուսանողների միջեւ:
Հետաքրքիր է ուսանողներից մեկի բերած փաստարկը: Մասնավորապես, թե՝ տարկետման ինստիտուտի սահմանափակելու օրինագծով սոցիալական արդարությունը չի վերականգնվի, քանի որ կան շատ այլ ոլորտներ, որոնք օգտագործում են բանակից ազատվելու համար, օրինակ, առողջապահական համակարգում: Ըստ այդմ. «Մինչեւ այդ ոլորտներում չի ապահովվել համապատասխան կարգ ու կանոն, այս ոլորտում կատարել փոփոխություն պաշտպանության նախարարության առաջ քաշած նախագծով, տրամաբանական չէ»:
Մեր տպավորությամբ, սա եւ նմանօրինակ փաստարկն ավելի շուտ դեմագոգիայի են նմանվում: Այսինքն՝ եթե առողջապահության ոլորտում կան սողանցքեր, ապա կրթության ոլորտում եղածները պետք է այդպես էլ թողնե՞լ: Տրամաբանությունը ո՛րն է:
Բերվել է կոնկրետ օրինագիծ, կոնկրետ դրույթներ են առաջարկվում, որոնք փակում են անվճար (պետպատվերով) ուսանող, ապա նույն տարբերակով ասպիրանտուրա «դասավորվելու» զարտուղի եւ կոռուպցիոն ճանապարհները:
Այդ քայլերը չկատարվե՞ն, որովհետեւ զարտուղի ճանապարհներին դիմողները հիվանդության տեղեկա՞նք կարող են գնել: Եվ հետո. իսկ ո՞վ է ասել, որ կյանքի կոչվող ու նախատեսվող սկզբունքային փոփոխությունները շրջանցելու են առողջապահության ու մյուս՝ խնդրին առնչվող ոլորտները:
Ա. Հակոբյան
Հոդվածն ամբողջությամբ կարդացեք «Հայոց Աշխարհ» օրաթերթի այսօրվա համարում
