«ՀՀ-ն շարունակելու է նախաձեռնող քաղաքականություն իրականացնել Հայոց ցեղասպանության ճանաչման գործում: Դրա արդյունքում է, որ Գերմանիան, ԱՄՆ 48 նահանգները, Չեխիան, լատինամերիկյան երկրներ ճանաչել են Հայոց ցեղասպանությունը»,-ՀՀԿ ԳՄ նիստի ավարտին լրագրողների հետ զրույցում այսօր անդրադառնալով այն փաստին, որ օրերս ԱՄՆ 48-րդ նահանգը ճանաչել է Հայոց ցեղասպանությունը, ասաց կուսակցության խոսնակ, ԱԺ փոխնախագահ Էդուարդ Շարմազանովը:
Նրա խոսքով՝ ՀՀ-ն շարունակելու է պայքարել թուրքական ժխտողականության դեմ, սակայն արտաքին քաղաքականության շրջանակներում գլխավոր հարցը մնում է Արցախյան հակամարտության խաղաղ եւ հայանպաստ կարգավորումը:
«Արցախի ժողովրդի ինքնորոշման իրավունքի իրացումն այլընտրանք չունի: Ուշ թե շուտ հասնելու ենք Արցախի հանրապետության միջազգային ճանաչմանը»,-նշեց նա:
Խոսելով նաեւ ԱԺ հանձնաժողովներում քննարկումների մասին՝ Էդուարդ Շարմազանովը համոզմունք հայտնեց. «Գտնում ենք, որ բյուջեն իրատեսական է եւ հնարավորություն է տալու 4.5-5 տոկոսանոց տնտեսական աճ ապահովել: Մենք սովորական եւ հանգիստ ենք վերաբերվում քննադատություններին: Ընդդիմության գործը, նախևառաջ քննադատելն է, իսկ իշխանությանը՝ գործ անելը, երբեմն էլ՝ առարկայական քննադատություններին պատասխանելը»:
Ինչ վերաբերում է կիրակի կայացած ՏԻՄ ընտրություններին, ՀՀԿ խոսնակը հայտնեց, որ ընտրված անկուսակցական երեք համայնքապետեր ՀՀԿ-ին անդամագրվելու դիմում են ներկայացրել:
Լուիզա ՍՈՒՔԻԱՍՅԱՆ
