ՀՀ Վարչական դատարանում այսօր սկսվել է քաղաքացիական ակտիվիստ, «Հայ կանանց ճակատ» ընդդիմադիր նախաձեռնության անդամ Գեղեցիկ Տոնոյանի գործով դատաքննությունը: Ոստիկանությունը պահանջում է ցուցարարին պատասխանատվության ենթարկել ՀՀ Վարչական իրավախախտումների վերաբերյալ օրենսգրքի 180.1-րդ հոդվածի 11-րդ և 15-րդ կետերի պահանջներով (տուգանք):
«Ոստիկանությունը գտնում է, որ Գեղեցիկ Տոնոյանը, երբ 2016թ. մարտի 24-ին մասնակցել է Մաշտոցի պողոտայում ի պաշտպանություն Գեւորգ Սաֆարյանի կազմակերպված հավաքին, խոչընդոտել է վերջինիս բնականոն ընթացքին, այնուհետեւ՝ չի կատարել ոստիկանի՝ հավաքի բնականոն ընթացքը խոչընդոտող գործողությունները դադարեցնելու մասին հնչեցրած պահանջը: Մինչդեռ մենք գտնում ենք, որ Տոնոյանը որեւէ իրավախախտում չի կատարել, նրան որեւէ պահանջ չի էլ հնչեցվել»,-Aravot.am-ի հետ զրույցում ասաց Գեղեցիկ Տոնոյանի շահերի ներկայացուցիչ, ՀՔԱ Վանաձորի գրասենյակի Երևանի ներկայացուցչության փաստաբան Տաթևիկ Սիրադեղյանը: Նա պահանջում է ոչ իրավաչափ ճանաչել ոստիկանների գործողությունները:
Այսօրվա նիստում կողմերը ներկայացրել են իրենց դիրքորոշումները, հետազոտվել են ապացույցները: Եւս մեկ ապացույց կհետազոտվի հաջորդ նիստում:
Լուիզա ՍՈՒՔԻԱՍՅԱՆ
