2016-ին «Լիա» գեղեցկության սրահում տեղի ունեցած սպանության գործով այսօր Շենգավիթ վարչական շրջանի ընդհանուր իրավասության դատարանը հարցաքննեց ամբաստանյալ Պետրոս Իսրայելյանի որդուն՝ Գոռ Իսրայելյանին: Նա նախ պարզաբանեց, թե ինչու նախորդ դատական նիստին չէր ցանկացել ցուցմունք տալ, ասաց՝ առողջական խնդիրներ ուներ, բացի այդ, ուզում է ամեն ինչ պատմի, քանի որ ամբաստանյալի աթոռին իր հայրն է:
Նրա պատմելով, դեպքի օրը, իրենց տան պատշգամբից նկատելով իրենց սրահի դիմաց մեքենաների կուտակումը, դուրս է եկել տանից, գնա՝ պարզելու՝ ինչ է եղել, ասաց՝ կուտակումը տեսնելով՝ մտածել է, որ ինչ-որ բան այն չէ: Վկայի խոսքով, գնացել է ուղիղ հոր գրասենյակ, որը սրահի նկուղային հարկում էր:
Նրա պատմելով, սրահ են եկել յոթից ութ անծանոթ, ու նրանցից մեկը վեճի է բռնվել Գեւորգի հետ, վեճն ավելի է բորբոքվել, սկսել են միմյանց հայհոյել: Անծանոթը, ըստ վկայի, զենք է հանել ու կրակել Գեւորգի վրա, վերջինս փաթաթվել է իրեն կրակող անծանոթին ու Գոռ Իսրայելյանի հիշելով՝ դանակով խփել: Վկայի հիշելով, ինքը վախից դիվանի հետեւում էր թաքնվել, իսկ կրակ բացած անծանոթը բղավում էր ՝ «ով հելնի դեմս, սպանելու եմ, էդ փողն էլ ստանալու եմ»:
Ըստ վկայի՝ անծանոթը 20.000-ի մասին էր խոսում: Գոռ Իսրայելյանն ասաց, որ հորը տեսել է միայն կրակոցներից հետո, շատ խառն էր ու միայն Գեւորգին փրկելու մասին էր մտածում:
Վկայի խոսքով, անծանոթը, որի անունը ինքը հետագայում է պարզել, որ Մուշեղ է, բաց չէր թողնում Գեւորգին, ինքը ստիպված աթոռով հարվածել է նրա գլխին, որ ազատի Գեւորգին ու տանի հիվանդանոց, այդպես էլ արել է: Հիվանդանոցից հետո փախուստի է դիմել, իսկ ավելի ուշ իրավապահներին հանձնել իրենց սրահի դիմաց թողնված զենքը, որը դեպքի օրն է օգտագործվել:
Հիշեցնենք, որ գեղեցկության սահում արձակված կրակոցների հետեւանքով երկու մարդ էր մահացել, այս գործով մեղադրանք է առաջադրվել Պետրոս Իսրայելյանին, Ալիկ Բանդուրյանին՝ Նորատուսցի Ալիկ եւ Ա. Գասպարյանին:
Արփինե ՍԻՄՈՆՅԱՆ
