Ավան եւ Նոր Նորք վարչական շրջանների ընդհանուր իրավասության դատարանում այսօր՝ 2016թ. ոստիկանության ՊՊԾ գունդը գրաված եւ մի շարք ծանր հանցագործությունների մեջ մեղադրվող «Սասնա ծռեր» խմբի անդամներից Պավել Մանուկյանի, Վարուժան Ավետիսյանի, Մխիթար Ավետիսյանի, Արայիկ Խանդոյանի, Գագիկ Եղիազարյանի, Արմեն Բիլյանի, Արեգ Կյուրեղյանի, Սմբատ Բարսեղյանի, Սեդրակ Նազարյանի եւ Էդվարդ Գրիգորյանի գործով հերթական դատական նիստում այսօր քննվեց ամբաստանյալներից Արայիկ Խանդոյանի շահերի պաշտպան, փաստաբան Արա Ղարագյոզյանի՝ այս գործով մեղադրանքը պաշտպանող դատախազներից Պետրոս Պետրոսյանի դեմ ներկայացրած բացարկի միջնորդությունը:
Պաշտպանի խոսքով՝ Պետրոսյանը Խանդոյանի հանդեպ կողմնակալ վերաբերմունք է դրսեւորել նախաքննության ընթացքում, առավել եւս՝ հայհոյել Խանդոյանին: Մյուս դատախազ Արամ Արամյանը միջնորդության դեմ առարկեց՝ պնդելով, որ այն իրավական որեւէ հիմք չունի: Լսելով դատախազի այս խոսքերը՝ ամբաստանյալ Արայիկ Խանդոյանը տեղից ասաց. «Իյա՜, իրո՞ք»:
Դատավոր Մեսրոպ Մակյանը (Կենտրոն եւ Նորք -Մարաշ վարչական շրջանների ընդհանուր իրավասության դատարանից է գործուղվել Էրեբունի եւ Նուբարաշեն վարչական շրջանների ընդհանուր իրավասության դատարան) վերադառնալով խորհրդակցական սենյակից՝ որոշեց մերժել դատախազի դեմ բացարկի միջնորդությունը: «Պաշտպանի կողմից չներկայացվեց վերաբերելի ապացույց առ այն, որ Պետրոս Պետրոսյանը դրսեւորել է կողմնակալ վերաբերմունք»,-ասաց դատավոր Մակյանը:
Լուիզա ՍՈՒՔԻԱՍՅԱՆ
