Ավան եւ Նոր Նորք վարչական շրջանների ընդհանուր իրավասության դատարանում այսօր՝ 2016թ. ոստիկանության ՊՊԾ գունդը գրաված եւ մի շարք ծանր հանցագործությունների մեջ մեղադրվող «Սասնա ծռեր» խմբի անդամներից Պավել Մանուկյանի, Վարուժան Ավետիսյանի, Մխիթար Ավետիսյանի, Արայիկ Խանդոյանի, Գագիկ Եղիազարյանի, Արմեն Բիլյանի, Արեգ Կյուրեղյանի, Սմբատ Բարսեղյանի, Սեդրակ Նազարյանի եւ Էդվարդ Գրիգորյանի գործով հերթական դատական նիստում դատավոր Մեսրոպ Մակյանը (Կենտրոն եւ Նորք Մարաշ վարչական շրջանների ընդհանուր իրավասության դատարանից է գործուղվել Էրեբունի եւ Նուբարաշեն վարչական շրջանների ընդհանուր իրավասության դատարան) վերադառնալով խորհրդակցական սենյակից՝ որոշեց մերժել պաշտպանական կողմից իր դեմ ներկայացված ինքնաբացարկի միջնորդությունը:
Ի տարբերություն այս գործի մեկ այլ անջատ մասով դատավոր Արտուշ Գաբրիելյանի՝ Մակյանն իր որոշումը հիմնավորեց: Նշեց՝ հիմնազուրկ են կասկածները, որ նա գործուղվել է հենց այս գործը քննելու համար, իսկ իր գործուղումը տեղի է ունեցել օրենքի պահանջներին համապատասխան՝ Դատարանների նախագահների խորհրդի որոշմամբ:
«Այո, ես գործուղվել եմ իմ համաձայնությամբ, բայց ոչ հատուկ այս գործը քննելու համար…Բացակա են օբյեկտիվ պատճառները՝ իմ կողմից ինքնաբացարկի միջնորդություն ներկայացնելու համար, ուստի այն անհիմն է»,-նկատեց Մեսրոպ Մակյանը:
Լուիզա ՍՈՒՔԻԱՍՅԱՆ
