ԱԺ պետաիրավական հարցերի մշտական հանձնաժողովն այսօր առանց «դեմ» եւ «ձեռնպահի» ընդունեց կառավարության առաջարկը` ՀՀ հողային օրենսգրքում փոփոխություններ կատարելու մասին: Հարցն ավելի վաղ էր քննվել: Պատգամավորներն առաջարկներ էին արել եւ վերադարձրել կառավարությանը: Կառավարությունն էլ ընդառաջ էր գնացել այդ առաջարկներին:
Նոր խմբագրմամբ, այսուհետ հողամասն անցնում է համայնքի սեփականությանը, եթե այն հարկադիր կարգով չի օտարվել երրորդ անձանց, եւ նախկին սեփականատիրոջը հատուցվել է հողի արժեքը: Այս փոփոխությունն առաջարկվել է`նկատի ունենալով, որ ՀՀ-ում հատուկ կացության կարգավիճակ ունեցող օտարերկրացիների`հողամասի նկատմամբ իրավունքը:
2015 թվականի խմբագրությամբ՝ ՀՀ Սահմանադրության 60-րդ հոդվածի 6-րդ մասի համաձայն՝ հողի սեփականության իրավունքից չեն օգտվում օտարերկրյա քաղաքացիները եւ քաղաքացիություն չունեցող անձինք: Իսկ Հատուկ կարգավիճակ ունեցող անձանց համար, բացառություն է սահմանված: Վերլուծությունը ցույց է տվել, որ ՀՀ-ում հատուկ կացության կարգավիճակ ստացած անձինք միայն գյուղատնտեսական հողերի նկատմամբ կարող են ձեռք բերել սեփականության իրավունք: Սակայն, ՀՀ օրենսդրությամբ կարգավորված չէ հատուկ կացության կարգավիճակի ժամկետը լրանալուց հետո այն չտրամադրելու, ինչպես նաեւ ՀՀ քաղաքացի հանդիսացած եւ քաղաքացիությունը դադարեցված անձանց սեփականության իրավունքով պատկանող գյուղատնտեսական նշանակության հողերի հետագա իրավական կարգավիճակը:
Նելլի ԳՐԻԳՈՐՅԱՆ
