Հայաստանցի երիտասարդ հեծանվորդ Էդգար Ստեփանյանն անձնական մարզիչ Արմեն Գյոզալյանի ղեկավարությամբ Վարշավայում մասնակցելով աշխարհի գավաթի խաղարկության փուլին՝ սկրեչ մրցաձեւում եզրագիծը հատել է երկրորդը՝ իրենից ետ թողնելով օլիմպիական խաղերի, աշխարհի ու մայրցամաքների առաջնությունների մեդալակիրների եւ մասնակիցների:
Սա մեծահասակների մեջ առաջին լուրջ նվաճումն է Անկախ Հայաստանի հեծանվասպորտի տարեգրությունում, ինչի մասին գրեցին լրատվամիջոցները:
Մեզանում լավ ավանդույթ է ձեւավորվել: Մարզաշխարհի եւ ազգային ֆեդերացիաների ղեկավարները միջազգային խոշորագույն մրցումներում բարձր արդյունքներ ցույց տված մարզիկներին ու մարզիչներին դիմավորում են «Զվարթնոց» օդանավակայանում: Ճիշտ է, հենց օդանավակայանում դիմավորելը պարտադիր չէ, սակայն դա գնահատանքի, ոգեշնչելու լրացուցիչ գործոն է:
Էդգարը Եվրոպայի առաջնությունում հաջող հանդես գալուց հետո աշխարհի վարկանիշային ցուցակում 68-րդն էր, իսկ Վարշավայում նվաճած արծաթե մեդալը նրան եւս 45 կետ վեր է բարձրացրել: Այժմ հայ հեծանվորդը զբաղեցնում է արդեն 23-րդ հորիզոնականը:
Մարզիկին եւ անձնական մարզչին «Զվարթնոց» օդանավակայանում դիմավորեցին ՀՀ սպորտի եւ երիտասարդության հարցերի փոխնախարար Գաբրիել Ղազարյանը, վարչության պետ Վաղինակ Գալուստյանը, հեծանվասպորտի ներկայացուցիչներ: Սակայն դիմավորողների մեջ չկար ազգային հավաքականի գլխավոր մարզիչ Անդրանիկ Առուստամյանը: Aravot.am-ը տեղեկացավ, որ ֆեդերացիայի նախագահը, որ նույնպես հանրապետությունում չէր եղել, այդ օրն էր վերադարձել Հայաստան եւ վատառողջ էր: Իսկ ազգային հավաքականի գլխավոր մարզիչը ոչ մի մեկնաբանություն չուներ:
Աշոտ ՀԱԿՈԲՅԱՆ
