«Այն, ինչ տեղի ունեցավ Սաուդյան Արաբիայում, հեղաշրջման կանխման փորձ էր, թեեւ այդ մասին դեռ պաշտոնապես չի հայտարարվում: Գործող թագավորական ընտանիքը կանխեց իր ընդդիմադիրների հեղաշրջման փորձը»,-«Հայելի» մամուլի ակումբում լրագրողների հետ զրույցում այսօր անդրադառնալով Սաուդյան Արաբիայում տեղի ունեցած աղմկահարույց իրադարձություններին, ասաց արաբագետ, տարածաշրջանային հարցերով փորձագետ Արմեն Պետրոսյանը:
Հիշեցնենք, որ օրերս Սաուդյան Արաբիայում ձերբակալվել են արքայազններ, տասնյակ ներկա ու նախկին նախարարներ, այլ ազդեցիկ պաշտոնյաներ:
Արմեն Պետրոսյանի գնահատմամբ՝ Սաուդյան Արաբիայում նման ներքին խմորումների եւ դժգոհությունների պատճառը երկրի՝ տարածաշրջանային գործընթացներում լուրջ խնդիրներ ունենալու փաստն է եւ արտաքին քաղաքականության թուլությունը. «Սաուդյան Արաբիայի գլխավոր մրցակիցը տարածաշրջանում Իրանն է, որի դերակատարության էական աճ է նկատվում վերջին մեկ տարում: Սիրիայի կարեւոր արտաքին դաշնակիցը եւս Իրանն է: Լիբանանում էլ լուրջ ազդեցություն ունեն շիայական ուժերը՝ «Հիզբալլահը»-ը, որի ուղղակի հովանավորն է կրկին Իրանը: Իրան-Իրաք-Սիրիա-Լիբանան շիայական այս շղթայում ուժեղացել է Իրանի ազդեցությունը…որպեսզի ձախողվի իրանական հաղթարշավը, Իսրայելը եւ Սաուդյան Արաբիան պետք է դիմեն որոշակի քայլերի»:
Նշյալ քայլերի ապացույցն, ըստ Արմեն Պետրոսյանի, Լիբանանի վարչապետի հրաժարականն է. «Ակնհայտ է, որ Սաուդյան Արաբիայում նրա վրա ճնշում է տեղի ունեցել: Նա հրաժարականի մասին հայտարարեց հենց այդ երկիր կատարած այցի ժամանակ: Իսրայելական լրատվամիջոցներն էլ գրեցին՝ հնարավոր է, որ Իսրայելը ռազմական գործողություններ իրականացնի Լիբանանում: Իսկ այդպիսիք իրականացվում են «Հիզբալլահի», այսինքն՝ Իրանի դեմ: Իսրայելն էլ իր հերթին մինչ օրս ակտիվ միջամտություններ է իրականացնում նաեւ Սիրիայի տարածքում: Վերջերս Հոմս նահանգում հարվածեց «Հիզբալլահի»-ի դիրքերին»:
Փորձագետը նաեւ նկատեց՝ բացառված չէ, որ ԱՄՆ հետախուզությունն է Սաուդյան Արաբիայի իշխանություններին տվյալներ հաղորդել այն մասին, որ հեղաշրջման փորձ է նախապատրաստվում:
Պետրոսյանը պատահական չի համարում այն փաստը, որ ձերբակալվածների թվում են այդ երկրի հեռահաղորդակցության կազմակերպության եւ ավիափոխադրող ընկերության տնօրենները՝ անձինք, որոնք ռազմավարական նշանակության շրջանակների ղեկավարներ են:
Լուիզա ՍՈՒՔԻԱՍՅԱՆ
