Էրեբունի եւ Նուբարաշեն վարչական շրջանների ընդհանուր իրավասության դատարանում այսօր՝ 2016թ. հուլիսի 29-ին Սարի թաղում զանգվածային անկարգություններ կազմակերպելու եւ ոստիկանության ՊՊԾ գունդը գրաված եւ ծանր հանցագործությունների մեջ մեղադրվող «Սասնա ծռեր» խմբին միանալու փորձի մեջ մեղադրվող ընդդիմադիր քաղաքական գործիչ Անդրիաս Ղուկասյանի գործով հերթական նիստում դատավոր Վարդան Գրիգորյանի դեմ ներկայացված ինքնաբացարկի միջնորդության առնչությամբ կարծիք արտահայտեց նաեւ ինքը՝ ամբաստանյալ Անդրիաս Ղուկասյանը:
Նա նշեց՝ նախորդ նիստում առանցքային վկա Գեղամ Սահակյանի՝ իր դեմ տված ցուցմունքն ունի քաղաքական նշանակություն. «Իշխանությունները միջազգային հանրությանը պետք է պատասխան տան, թե ինչու այս գործով մյուս յոթ մեղադրյալներն ազատ են արձակվել, իսկ ես՝ ոչ, եւ թե ինչու է Գեղամ Սահակյանը մեկ տարի անց փոխում իր ցուցմունքի բովանդակությունը: Այդ ցուցմունքի հիման վրա են իմ հանդեպ քրեական գործ հարուցել, հետեւաբար, այն կարեւոր է եւ ունի քաղաքական նշանակություն: Դա է խոսում այն փաստը, որ նրա ցուցմունքն այսօր փոխվել է: Դա ո՞նց եղավ: Իշխանությունները հիմա պետք է միջազգային հանրությանը բացատրեն դա»:
Անդրիաս Ղուկասյանի բնորոշմամբ՝ դատարանի՝ նախորդ նիստում կայացրած՝ Սահակյանի նախաքննական ցուցմունքը չհրապարակելու որոշումը սպասարկում է իշխանության շահերին. «Զոռբայությամբ այդ ցուցմունքը մեկ տարի հանդիսացել է հիմք՝ ինձ կալանքի տակ պահելու համար»:
Մեղադրյալի խոսքով՝ նախորդ նիստում նշյալ վկան կաշկանդված չեղավ եւ սուտ ցուցմունք տվեց. «Նախաքննության ժամանակ էլ քառասուն վկաները սուտ ցուցմունք են տվել, որոնցից 33-ը՝ ոստիկան, մյուսները՝ ոստիկանության հետ կապ ունեցող անձինք: Գեղամ Սահակյանի գործակալ լինելու փաստը եւս ակնհայտ է…ՀՀ բարձր պաշտոնյաները «պապայի արեւ» են երդվում, թե դատական համակարգը բարեփոխվում է, բայց իրականությունը հեռու է դրանից»:
Դատարանը հեռացավ խորհրդակցական սենյակ՝ միջնորդության առնչությամբ որոշում կայացնելու:
Մանրամասները՝ տեսանյութում:
Լուիզա ՍՈՒՔԻԱՍՅԱՆ
