Էրեբունի եւ Նուբարաշեն վարչական շրջանների ընդհանուր իրավասության դատարանում այսօր ընդդիմադիր քաղաքական գործիչ Անդրիաս Ղուկասյանի գործով հերթական դատական նիստն է: Հիշեցնենք, որ նա մեղադրվում է 2016թ. հուլիսի 29-ին Սարի թաղում զանգվածային անկարգություններ կազմակերպելու եւ ոստիկանության ՊՊԾ գունդը գրաված եւ ծանր հանցագործությունների մեջ մեղադրվող «Սասնա ծռեր» խմբին միանալու փորձի մեջ:
Նախորդ նիստում դատարանն արգելել էր վկաների հարցաքննության փուլի տեսանկարահանումը, մինչդեռ դատարանի կարգադրիչները, նիստը դեռ չսկսած, «Ազատություն» ռ/կ-ի եւ A1plus-ի օպերատորներին, որոնք կադրեր էին անում, հրահանգեցին տեսախցիկները դուրս հանել նիստերի դահլիճից: Օպերատորները հիշեցրին, որ նիստը դեռ չի սկսվել, Ղուկասյանի շահերի պաշտպան, փաստաբան Կարեն Մեժլումյանն էլ նկատեց՝ նիստը սկսվելուն պես ինքը միջնորդություն է անելու, ուստի կարելի է դատավորից հարցը ճշտել:
Կարգադրիչները, սակայն, պնդեցին, որ դատավորն է հրահանգել տեսախցիկները դուրս հանել ու վիճաբանեցին օպերատորների հետ՝ նրանց դիմելով «դավա՜յ»-ով: Ի վերջո, տեսախցիկները դուրս հանվեցին: Նիստը սկսվելուն պես Կարեն Մեժլումյանը միջնորդեց վերացնել տեսանկարահանման արգելքը, քանի որ վկա չի հարցաքննվելու, այլ իր միջնորդությունն է լսվելու, սակայն դատավոր Վարդան Գրիգորյանը պնդեց՝ վկաների հարցաքննության փուլում են, ուստի տեսանկարահանումն արգելվում է:
Լուիզա ՍՈՒՔԻԱՍՅԱՆ
