ԼՂՀ պաշտպանության նախկին նախարար, «Իգլա»-ի գործով մեղադրյալ Սամվել Բաբայանի պաշտպան, փաստաբան Արտաշես Քալաշյանը համոզված է՝ մեղադրող կողմի ներկայացրած ապացույցները չեն հիմնավորում, որ Սամվել Բաբայանը հանցագործություն է կատարել: «Իգլա»-ի գործով հերթական դատական նիստի ավարտին այսօր նա լրագրողների հետ զրույցում կարծիք հայտնեց, որ Բաբայանն անմեղ է:
Քալաշյանը չմասնավորեցրեց, թե ի վերջո՝ ո՞ւմ եւ ինչո՞ւ է ձեռնտու ազատազրկել Բաբայանին, բայց որպես իրավաբան նշեց. «Կարող եմ միայն արձանագրել, որ մեղադրանքը հիմնավորված չէ»:
Aravot.am-ի հարցմանն ի պատասխան, թե ի՞նչ նկատի ունի պարոն Բաբայանը, երբ ասում է, որ «Իգլան» ինչ-որ մեկի «գարաժից» են հանել-բերել, Քալաշյանն այսպես արձագանքեց. «Քրեական գործի նյութերից երեւում է, որ այն ոչ մի տեղից էլ չի բերվել: Հակառակ դեպքում՝ զենքի մաքսանենգության մեղադրանքը նախաքննության ընթացքում չէր կարճվի»:
Հավելենք, որ առաջիկա նիստերում կլսվեն մեղադրական ճառն ու ամբաստանյալների վերջին խոսքը:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
