Այսօր կառավարությունը ԱԺ Պաշտպանության եւ ազգային անվտանգության հարցերի հանձնաժողովի քննարկմանն էր ներկայացրել օրենքի նախագիծ, որով առաջարկում էր ցանկացած երկրից բացառապես ռազմական նշանակության արտադրանքի ներմուծումն ազատել ավելացված արժեքի հարկից:
Հիշեցնենք, որ հանձնաժողովի նախորդ նիստում կառավարությունը ներկայացրել էր նախագիծ, ըստ որի ՀՀ-ի եւ ՌԴ-ի միջեւ միջպետական համաձայնագրերի շրջանակներում ՀՀ ԶՈՒ-ի համար միայն Ռուսաստանից բացառապես ռազմական նշանակության արտադրանքի ներմուծումը պետք է ազատվեր ավելացված արժեքի հարկից:
ՀՅԴ-ական Ռոմիկ Մանուկյանը դժգոհեց, որ այսպես առավելություն ենք տալիս ՌԴ-ին, ուստի կառավարությունն այսօր առաջարկում է բոլոր երկրների համար դա կիրառել: Նա առաջարկել էր նախագիծը հետ տանել եւ բերել ընդհանուր բոլոր երկրներին վերաբերող առաջարկ, որպեսզի հետո Չինաստանից, Իրանից, տարբեր երկրներից զենքի ներմուծման համար առանձին-առանձին կառավարությունը նախագծեր չբերի ԱԺ:
Հատկապես ապրիլյան պատերազմի ժամանակ խնդիր էր առաջացել զենքի ներմուծման հետ, քանի որ անգամ նվիրատվությամբ ՀՀ մտնող զենքի համար ստիպված մարդիկ վճարում էին հարկ:
Հանձնաժողովը հավանություն տվեց կառավարության նախագծին:
Հռիփսիմե ՋԵԲԵՋՅԱՆ
