«Սա ուղղակի զրույց էր, կարծիքների փոխանակում: Ես պատմում էի իմ փորձը, երբ որ երկրորդ կուրսից մինչեւ ինստիտուտի ավարտն աշխատում էի շտապ օգնությունում: Սա նախագիծ չէ, հիմնված չէ ինչ-որ լուրջ ուսումնասիրությունների վրա: Դրա հետ մեկտեղ այսօրվա հայտարարությունը չի նշանակում, որ հարցն արդիական չէ»,-խորհրդարանում լրագրողների հետ զրույցում ասաց ՀՀ առողջապահության նախարար Լեւոն Ալթունյանը:
Հիշեցնենք, որ վերջերս նախարարի արտահայտած կարծիքը`շտապօգնության վճարովի լինելու մասին, մեծ աղմուկ բարձրացրեց:
Նախարարը հստակեցրեց`նման նախագիծ չկա: Բայց ինքն այդ հարցն արդիական է համարում, քանի որ կան անարդյունավետ կանչեր, կան կանչեր, որոնք բնակչության ոչ իրազեկվածության կամ մի փոքր էլ չարաշահման հետեւանք են: Ինչեւէ, առաջիկա մեկ տարվա ընթացքում նման փոփոխություններ չեն նախատեսվում:
Լրագրողները հետաքրքրվեցին նաեւ առողջապահական համակարգի ստվերային շրջանառությունից: Նախարարն ասաց`իր կարծիքով, այսօր ստվերը Հայաստանում շատ ավելի քիչ է, քան այդ մասին տարածվող խոսակցությունները: Համակարգում ստվերի առկայությունը նախարարը թվերով չասաց: Չգիտեր: Դրա համար ասաց, որ առաջիկայում հասարակական հարցումներ կանցկացնեն:
Նելլի ԳՐԻԳՈՐՅԱՆ
