Շիրակի մարզի Անիի տարածաշրջանի 17 միավորվող համայնքների (Աղին, Անիավան, Անիպեմզա, Բագրավան, Նոր Շեն, որը Բագրավանի միավոր բնակավայրերից է, Գուսաննա, Իսահակյան, Լանջիկ, Լուսաղբյուր, Հայկաձոր, Ձիթհանքով, Ձորակապ, Շիրակավան, Ջրարփի, Սառնաղբյուր, Սարակապ, Քարաբերդ, վարչական կենտրոնը կլինի Մարալիկ քաղաքը), համայնքապետի պաշտոնում երեկ տեղի ունեցած ընտրություններում հաղթող է ճանաչվել Մարալիկի քաղաքապետ Արտակ Գևորգյանը՝ ստանալով 3909 ձայն: Նա, հիշեցնենք ՀՀԿ-ի թեկնածուն է, Սամվել Նիկոյանի սանիկն է:
Այստեղ մրցակցությունը հիմնականում Արտակ Գևորգյանի և Սառնաղբյուրի նախկին գյուղապետ, գործարար Հրաչյա Աճեմյանի միջև էր. վերջինս բավական մեծ հեղինակություն ունի Անիի տարածաշրջանում: Գործարարը ստացել է 1926 ձայն:
Ձայների թվով երրորդ տեղում Մարալիկից ինքնառաջադրված անկուսակցական Աղասի Առաքելյանն է, ստացել է 1799 ձայն:
Մարալիկում ԲՀԿ- թեկնածուն, ինչպես և Ախուրյանում պարտվեց. Հակոբ Աղաբեկյանը ստացավ 1547 ձայն:
Ամենաքիչ ձայները հավաքել է Մարալիկի թիվ 2-րդ դպրոցի ուսուցիչ, ՀՀԿ-ական Խաչատուր Բուլոյանը՝ ստանալով 1494 ձայն:
Նշենք նաև, որ Ձիթահանքովի գյուղապետ Հովիկ Պողոսյանը, որը բավական մեծ վտանգ էր ներկայացնում ՀՀԿ-ի համար, հանել էր իր թեկնածությունը՝ փաստացի մեծ լավություն անելով Արտակ Գևորգյանին: Նա մինչև Ազգային Ժողովի ընտրությունները ՀՅԴ-ական էր, սակայն ԱԺ ընտրություններում սատարեց Շիրակի նախկին մարզպետ․ գեներալ Ֆելիքս Ցոլակյանին, այդ պատճառով էլ հեռացվեց կուսակցության շարքերից։
Անիում կա 17 հազար 214 ընտրող, սակայն ընտրությանը մասնակցել են 9829-ը, 154 ձայն անվավեր է ճանաչվել:
Նունե ԱՐԵՎՇԱՏՅԱՆ
