2018-ի բյուջեով սոցիալական պաշտպանության ոլորտին տրամադրվող ծախսերը նվազել են 362 մլն դրամով, մինչդեռ ժողովրդի սոցիալական վիճակն օրեցօր վատթարանում է: Խորհրդարանում, 2018 թվականի բյուջեի նախագծի քննարկումների ժամանակ դիմելով ՀՀ ֆինանսների փոխնախարար Ատոմ Ջանջուղազյանին, ասաց «Ծառուկյան» խմբակցության պատգամավոր Գեւորգ Պետրոսյանը: «Արդոք սա չի՞ հակասում Սահմանադրության այն դրույթին, որ ՀՀ-ում մեծագույն արժեքը մարդն է, բայց նվազեցնում ենք այդ թիրախը ապահովելու ծախսերը», – հետաքրքրվեց նա:
«Սոցիալական պաշպանության բնագավառի ծախսերը, չափազանց կարեւոր լինելով, չեն փոխարինում մարդուն՝ աշխատելով իր կենսամակարդակը բարձրացնելու հնարավորություն տվող ծրագրերին։ Ասում եք՝ վատացել է, բայց ինչո՞վ է վատացել։ Ձեր դիտարկմանը, թե մեկը, ով կարող է պնդել, որ վիճակը չի վատթարացել, ուրեմն ոչ թե ապրում է Հայաստանում, այլ պարզապես գտնվում է այստեղ, կարող եմ ասել, որ գործազրկությունն այս տարվա առաջին կիսամյակում եթե 19 տոկոս էր, ապա հիմա դարձել է 17.8 տոկոս։ Ակտիվ բնակչության թիվն աճել է։ Այն մարդիկ, ովքեր առաջ աշխատանք չունեին եւ հիմա աշխատանք ունեն, իրենց համար սոցիալական վիճակը լավացե՞լ է, թե՞ վատացել։ Միայն պնդումը, որ վատացել է, ավելի շատ իր մեջ էմոցիա է պարունակում, քան՝ հիմնավորում, որովհետեւ հիմնավորում են թվերը»,- պատգամավորին հակադարձեց Ատոմ Ջանջուղազյանը:
Գեւորգ Պետրոսյանն էլ իր հերթին հակադարձեց փոխնախարարին` նկատելով, որ եթե աշխատավարձն ու թոշակը չեն ավելացել, ապա լավացման մասին խոսք լինել չի կարող. «Ասում եք` այս բյուջեն ուղղված է կապիտալ ներդրումներին. կներեք, եթե պետությունը նույնացնում ենք ընտանիքի հետ, ես պետք է մի զուգահեռ բերեմ: Սա նույնն է, երբ ընտանիքի հայրը կանգնի ասի` բնակարանը պետք է վերանորոգենք մյուս տարի, հետեւաբար ոչ պետք է հաց ուտենք, ոչ հագուստ գնենք: Սա ի՞նչ մոտեցում է»:
Նելլի ԳՐԻԳՈՐՅԱՆ
