Շիրակի մարզի խոշորացվող Ախուրյանում համայնքում երեկ տեղի ունեցած ՏԻՄ ընտրություններում հաղթեց Ախուրյանի 21 տարվա գյուղապետ, ՀՅԴ-ական Արծրուն Իգիթյանը, որին սատարում էր նաև ՀՀԿ-ն ու հատկապես Գյումրու քաղաքապետ Սամվել Բալասանյանը: Այստեղ պայքարը հիմնականում ընթանում էր Արծրուն Իգիթյանի և ԲՀԿ-ի թեկնածու Կարեն Սերգոյանի միջև, որի քարոզարշավին ակտիվ մասնակցություն ունեին ԲՀԿ-ական պատգամավորներ Վարդան Ղուկասյանն ու Վարդևան Գրիգորյանը:
Արծրուն Իգիթյանը ստացել է 2393 ձայն, Կարեն Սերգոյանը՝ 1512 ձայն:
Բասենի գյուղապետ Համլետ Պետրոսյանը, որն, ի դեպ, հանրապետական կուսակցության անդամ է, ու սեփական կուսակցությունը չսատարեց նրան, թեև մարզի ամենագործունյա, ստեղծարար գյուղապետերից է, ստացավ 966 ձայն, Բասենի գրեթե ողջ բնակչությունը իրեն էր տվել ձայնը:
Ձայների քանակով 4-րդ տեղում Ախուրյանի «Համալիր-մարզադպրոց» ՀՈԱԿ-ի տնօրեն, անկուսակցական Լևոն Գեղամյանն է, նա ստացել է 880 ձայն: 5-րդ տեղում անկուսակցական խանութատեր Գերասիմ Համբարյանն է՝ 615 ձայնով:
6 թեկնածուներից ամենաքիչ ձայները հավաքել է Շիրակի մարզի քննչական վարչության պետի տեղակալ Սահակ Մկրտչյանի եղբայրը՝ Վանիկ Մկրտչյանը, որը «Շիրակ» ջուր օգտագործողների ընկերության տեղամասի պետն է, նա ստացավ 406 ձայն:
Ընտրողների թիվը Ախուրյանում 13 հազար 397 է, մասնակցել են 6887-ը, այսինքն՝ ընտրողների մոտ 51 տոկոսը, 111 ձայն ճանաչվել է անվավեր:
Նունե ԱՐԵՎՇԱՏՅԱՆ
