«Շահառուներին մատուցվող ծառայություները չեն վատթարացվի, ճիշտ հակառակը՝ փոքր բյուջեով հնարավոր է մեծ հաջողությունների հասնել»,- խորհրդարանում 2018 թվականի բյուջեի նախագծի քննարկումների ժամանակ հայտարարեց ՀՀ ֆինանսների փոխնախարար Ատոմ Ջանջուղազյանը:
Նկատենք, որ 2018 թվականի բյուջեով նախատեսվում է առողջապահության նախարարությանը տրամադրել 80.1 մլրդ դրամ: Բացարձակ թվով դա շուրջ 5.8 մլրդ դրամով ավելի պակաս է 2017-ի ցուցանիշից:
Ազգային ժողովի առողջապահության եւ սոցիալական հարցերի հանձնաժողովի նախագահ Հակոբ Հակոբյանն իր անհամաձայնությունը հայտնեց փոխնախարարի լավատեսությանը`ասելով, որ առողջապահության ոլորտում լուծում պահանջող այնքան խնդիր կա, ուստի դրանք լուծելու համար բյուջեն չպետք է կրճատվի. «5 մլրդ կրճատելը գոնե տրամաբանորեն ճիշտ չէ»:
Փոխնախարարը հակադարձեց`բոլոր ոլորտներում էլ ավելի շատ հատկացումների կարիք կա, քան տրամադրվում է։
Նելլի ԳՐԻԳՈՐՅԱՆ
