«Որքանով է արժանահավատ պնդումը, որ 2018-ին նախատեսվում է 3.5 տոկոս գնաճ, եթե հաշվի առնենք, որ ԵԱՏՄ մաքսային օրենսգրքի ուժի մեջ մտնելուց հետո գնաճային ճնշումները մեծանալու են։ Արդյոք այդ հանգամանքի բերումով լայն սպառման մի շարք ապրանքներ թանկանալու են։ Կարագն արդեն իսկ թանկացել է, դա կշարունակվի, թե չէ»,- խորհրդարանում 2018 թվականի բյուջեի նախագծի քննարկումների ժամանակ ՀՀ ֆինանսների փոխնախարար Ատոմ Ջանջուղազյանին հարցրեց «Ելք» խմբակցության ղեկավար Նիկոլ Փաշինյանը:
Փոխնախարարն ասաց` 2018 թվականի բյուջեի նախագծով 3.5 տոկոս գնաճ չի կանխատեսվում. «Դուք հավանաբար դեֆիլյատորը նկատի ունեք 3.5 տոկոս, որովհետեւ նախագծով գնաճը նախատեսվում է 4 գումարած-հանած 1.5 տոկոսի միջակայքում։ Այդ տեսակետից արժանահավատությունը կասկած չի հարուցում գոնե այն կանխատեսումների շրջանակում, որոնք մենք ունենք։ Եթե կանխատեսումները ոչ արժանահավատ են թվում, մենք պատրաստ ենք դրանց շուրջ քննարկումներ իրականացնել»:
«Կանխատեսվում է, որ 2018-ին լայն սպառման ապրանքներ են թանկանալու ԵԱՏՄ մաքսային օրենսգրքի ուժ մեջ մտնելուց հետո»,- փորձագետներին հղում անելով նկատեց Նիկոլ Փաշինյանը։
Ատոմ Ջանջուղազյանը չհերքեց`որոշ ապրանքատեսակներ կարող են թանկանալ: Միաժամանակ, նա հորդորում է` այդքան էլ չհավատալ փորձագետների պնդումներին. «Դրանց դժվար է արձագանքել, քանի դեռ դրանց տակ եղած դատողությունների համակարգը բացակայում են»:
Նելլի ԳՐԻԳՈՐՅԱՆ
