Այսօր ԱԺ-ում 2018-ի բյուջեի նախագծի քննարկման փոխոստիկանապետ Վարդան Եղիազարյանին «Ելք» խմբակցության պատգամավոր Էդմոն Մարուքյանը բողոքեց, որ չնայած այդքան գումար է ծախսվում, արագաչափերով այդքան մարդկանց տուգանում են, նաեւ շրջիկ մեքենաներով են տուգանում, բայց դա չի կանխարգելում եւ չի նվազեցնում վթարներն ու դրա հետեւանքով մահվան դեպքերը. «Դուք տուգանում եք, դրանից բան չի փոխվում, բացի այն, որ այդ գումարները գնում են ձեր արտաբյուջե, մենք մարդկանց տուգանելով՝ դրա դեմը չենք առնում: Եթե ոստիկանությունը չդարձավ նախարարություն եւ խորհրդարանական վերահսկողության ներքո չեղավ, մենք չունեցանք Ներքին գործերի նախարարություն, անունը ոնց ուզում եք դրեք, ես ոստիկանությունում զարգացում չեմ կանխատեսում»:
ՀՀԿ պատգամավոր, նախկին ոստիկանապետ Ալիկ Սարգսյանն էլ հակադարձեց, որ ոստիկանությունը քավության նոխազ են դարձրել, ինչ լինում է, ասում են՝ ոստիկանությունն է մեղավոր, այդ թվում՝ ճանապարհային ոստիկանությանն են մեղադրում վթարների աճի հետ կապված, մինչդեռ շան գլուխը այլ տեղ է թաղված. «Բազմաթիվ օբյեկտիվ եւ սուբյեկտիվ պատճառներ կան»:
Նա ասաց, որ այդ խնդիրները փորձում են փաթաթել ոստիկանության վզին: Նա կոնկրետ օրինակ բերեց, թե ով է վթարային իրավիճակների համար պատասխանատու եւ մատնացույց արեց տրանսպորտի եւ կապի նախարարությանը. «Խոսքս վերաբերվում է Արտաշատ-Երեւան մայրուղուն՝ այսպես կոչված ժամանակակից տեխնոլոգիաներով, բետոնապատված այդ ճանապարհին,, որի վրա այդքան ուրախացել էինք, մի հատ խնդրում եմ վերլուծեք, թե մեկ տարվա ընթացքում այդ ճանապարհի վրա ինչքան վթարներ են եղել, ինչքան կյանքեր են զոհվել: Բոլոր թվերը գրանցում են ոստիկանության վրա: Ոստիկանությունը չի պատասխանատու, մեկ այլ մարմին կա, թող նրան մեջտեղ բերեն, թող պատասխան տա»:
Նա բողոքեց, որ այդ ճանապարհը երբ ուզում են՝ պատեհ-անպատեհ փակում են ու վարորդներին ուղղորդում են մեկ այլ ճանապարհով, գիշերով ու վթարներ են ստեղծում. «Վարորդները անսպասելի հայտնվում են այն վիճակում, որ հանդիպակաց կողմից մեկ ուրիշ երթեւեկություն է, պատեհ-անպատեհ բետոնապատ ճանապարհի վրա սեւ գույնի ասֆալտով վերանորոգում են, վարորդները արգելակում են եւ մի շարան է ստացվում վթարների: Բազմաթիվ այսպիսի խնդիրներ կան, այս ճանապարհը պատուհաս է դարձել, խնդրում եմ, պարոն Եղիազարյան, այս մեղքը ձեր վրայից հանեք, ժողովուրդը չի իմանում ում մեղքով է, ոստիկանությունը կապ չունի սրա հետ, այլ կառույցներ կան՝ պատկան մարմիններ, որոնք այս քննադատությունից ընդհանրապես դուրս են մնացել»:
Հռիփսիմե ՋԵԲԵՋՅԱՆ
