Ռուսաստանի հումանիտար գիտությունների ինստիտուտի պրոֆեսոր Սերգեյ Մարկեդոնովը համամիտ չէ այն պոպուլյար տեսակետի հետ, որ 2016թ. քառօրյա պատերազմի ընթացքում Ադրբեջանի եւ Հայաստանի միջեւ ռազմական բալանսը խախտված էր՝ ի հաշիվ ՀՀ-ի ռազմավարական գործընկերոջ՝ Ռուսաստանի Դաշնության կողմից Ադրբեջանին հարձակողական զինատեսակների եւ այլ զինտեխնիկայի վաճառքի: Համենայնդեպս, այսօր Հայ-ռուսական (Սլավոնական) համալսարանում լրագրողներից մեկի հարցին՝ արդյոք Հայաստանի եւ Ռուսաստանի միջեւ կնքված զինտեխնիկայի ձեռքբերման նոր՝ 100 մլն դոլարի համաձայնագիրը նպատակ ունի հավասարակշռելու ռազմական բալանսը, ռուս փորձագետը թերահավատություն հայտնեց:
Վերջինս, հիշեցնենք՝ Երեւանում է գտնվում «Ազգային ինքնության հարցերը արդի համաշխարհայնացման պայմաններում» միջազգային գիտաժողովի շրջանակներում: Նա նկատում է, որ սահմաններում լարվածությունն աճում էր մինչ 2016 թվականն էլ. «Եվ հարցն այն չէ, որ Ռուսաստանն Ադրբեջանին ինչ-որ զենք է վաճառել: Այո, այստեղ կարելի է վիճել, ինքս էլ Ռուսաստանում հանդես եմ եկել դրա դեմ: Բայց չլինի ռուսական զենքը, կլինի իսրայելականը, թուրքականը: Փաստն այն է, որ զենքի պահանջարկ կա: Ցանկություն՝ հարցը ուժով լուծելու՝ նույնպես: Պետք է մտածել այն մասին, թե ինչպես նվազեցնել այդ ցանկությունը»: Արցախյան հակամարտությունը խաղաղ ճանապարհով լուծման հասցնելու համար ռուս փորձագետը անհրաժեշտ է համարում, որպեսզի միջնորդական առաքելություն ստանձնած երկրները միմյանց հետ շփվեն գոնե ոչ իբրեւ թշնամիներ:
Այլ մանրամասները՝ տեսանյութում:
Նելլի ԳՐԻԳՈՐՅԱՆ
