Աշխարհահռչակ ռոք երաժիշտ Սերժ Թանկյանը կոչ է արել Հայաստանին հեռու մնալ ամերիկյան «Մոնսանտո» ընկերությունից, որը բույսերի բիոտեխնոլոգիաների համաշխարհային առաջատար է համարվում:
«Հայաստան, խնդրում եմ, խնդրում եմ, հեռու մնա Մոնսանտոյից: Մեծ թվով ապացույցներ կան առ այն, որ Մոնսանտոն թունավորել է մեր միջավայրը՝ հանգեցնելով մեղուների աղետալի անկման»,- Facebook-ի իր էջում գրել է Թանկյանը՝ հավելելով, որ այդ ընկերության մշակած գենետիկորեն ձևափոխված մթերքները նախանշում են «օրգանական մաքուր սննդի վերջը»:
Թանկյանի խոսքով՝ ԱՄՆ-ում և Եվրոպայում «Մոնսանտոն» հայտնի է որպես չարիք՝ իր վարքագծի համար:
«Երբ ես Հայաստանում կծում եմ խնձորը, այն մաքուր է, խրթխրթան և համեղ՝ գյուղատնտեսության և մշակության հազարավոր տարիների արդյունք: Խնդրում եմ, թողեք դա այդպես էլ մնա: Շնորհիվ Մոնսանտոյի՝ ես չեմ կարող այդպիսի խնձոր գտնել ԱՄՆ-ում»,- գրել է Թանկյանը:
Հիշեցնենք, ավելի վաղ հաղորդվում էր, որ «Մոնսանտո» ընկերությունը հետաքրքրված են Հայաստանում ներդրումներ կատարելու հարցում:
Պատրաստեց՝ Վիկտորյա ԱՆԴՐԵԱՍՅԱՆԸ
