Շենգավիթ վարչական շրջանի ընդհանուր իրավասության դատարանում այսօր շարունակվում է «Ժիրայր Սեֆիլյանի եւ մյուսների գործով» դատաքննությունը: «Հիմնադիր խորհրդարան» ընդդիմադիր շարժման առաջնորդ, Շուշիի առանձնակի գումարտակի հրամանատար Ժիրայր Սեֆիլյանը մեղադրվում է ապօրինի զենք-զինամթերք պահելու, հանցավոր նպատակներով խումբ (ամբաստանյալներ՝ Ներսես Պողոսյան, Սասունիկ Կիրակոսյան, Գալուստ Գրիգորյան, Հովհաննես Պետրոսյան, Գեւորգ Սաֆարյան, Հրայր Թոփչյան) ձեւավորելու, շենք-շինություններ, մասնավորապես՝ զորամաս եւ Երեւանի հեռուստաաշտարակը զավթելու փորձի մեջ:
Այսօր Սաֆարյանի համար որպես հանրային պաշտպան ներկայացել էր փաստաբան Աննա Ջուվանովան: Թեեւ Սաֆարյանի պաշտպան Տիգրան Եգորյանը գրություն էր ուղղել դատավոր Տաթեւիկ Գրիգորյանին առ այն, որ վատառողջ լինելու պատճառով չի կարող ներկայանալ, դատավորն արձանագրեց, որ նա նախորդ նիստերում էլ չի ներկայացել եւ չարաշահել է իր դատավարական իրավունքը:
«Նա չարամտորեն չի ներկայացել նախորդ նիստին եւ նախազգուշացվել, որ իր իրավունքները շարունակաբար չարաշահելու դեպքում հանրային պաշտպան կներգրավվի»,-հայտարարեց դատավորը: Աննա Ջուվանովան ներգրավվեց, ինչի դեմ տեղից նստած խոսելով՝ առարկեց Գեւորգ Սաֆարյանը:
Դատավորը նրան նախազգուշացրեց, որ ըստ կարգի՝ դատարանին պետք է դիմել կանգնած: «Սպառնալիքներն ինձ վրա չեն ազդում»,-շարունակեց Գեւորգ Սաֆարյանը: Դատավորը նրան հերթական անգամ ենթարկեց սանկցիայի՝ նիստերի դահլիճից հեռացում 4 ժամով:
Լուիզա ՍՈՒՔԻԱՍՅԱՆ
