Հայաստանում է Փարիզի ակադեմիայի ռեկտոր, Փարիզի համալսարանների կանցլեր Ժիլ Պեկուն: Նա Հայաստանում Ֆրանսիայի արտակարգ և լիազոր դեսպան Ջոնաթան Լաքոտի, Փարիզի ակադեմիայի պատվիրակության և Փարիզի 9-րդ շրջանի քաղաքապետի տեղակալ, ՀՖՀՀ-ի հոգաբարձուների խորհրդի անդամ, Հայկական բարեգործական ընդհանուր միության Եվրոպայի գրասենյակի նախկին նախագահ Ալեքսի Գովցյանի ուղեկցությամբ նոյեմբերի 2-ին այցելեց Հայաստանում ֆրանսիական համալսարան:
Aravot.am-ի հետ զրույցում պարոն Պեկուն նշեց, որ շատ ուրախ է լինել Հայաստանում՝ որպես Փարիզի ակադեմիայի ռեկտոր:
Նա տեղեկացրեց, որ Փարիզի ակադեմիան Փարիզ քաղաքի դպրոցական եւ համալսարանական կառույց է, որը համակարգում է 1124 դպրոցների եւ 25 բարձրագույն ուսումնական հաստատությունների գործունեությունը:
Ի դեպ, ակադեմիայի ռեկտորն էլ նշանակվում է հանրապետության նախագահի կողմից եւ սահմանում այդ հաստատությունների կրթական քաղաքականությունը, համակարգում նրանց գործունեությունը: Ընդ որում, խոսքը վերաբերում է շուրջ 28000 աշխատակցի:
«Ինչո՞ւ ես այցելեցի Հայաստան, առաջին հերթին նրա համար, որ կարեւորում եմ մեր երկու երկրների կրթական, գիտական եւ մյուս ոլորտներում կապերը, որոնք ստեղծվել են դարերի ընթացքում: Հայաստանը տարածքով փոքր երկիր է, բայց այնպիսի տաղանդներ, խելացի մարդիկ ունի, որ ես հավատում եմ Հայաստանի ներուժին եւ մեր կապերի էլ ավելի ընդլայնմանը»,-հավելեց պարոն Պեկուն: Պատասխանելով մեր հաջորդ հարցին, ասաց, որ պատրաստ է աջակցել Հայաստանում ֆրանսիական համալսարանի ուսանողների պրակտիկային Փարիզի ակադեմիայում:
Aravot.am-ը խնդրեց անդրադառնալ Ժիլ Պեկուի` Հայաստանում ֆրանսիական համալսարանում կարդացած դասախոսության հայկական շեշտադրումներին: Ռեկտորի դասախոսության թեման էր «Սորբոնը և ֆրանսիացի մտավորականները և համախմբում հանուն հայերի 19-րդ դարի վերջում»:
«Իմ դասախոսության մեջ ես ներկայացնում եմ, թե ինչպես են ֆրանսիացի մտավորականները, դասախոսները համախմբվել 19-րդ դարի վերջում` հանուն հայերի շահերի, երբ սկսվել են ջարդերը: Կապն ու համակրանքը հայերի նկատմամբ միշտ շեշտադրված է եղել Ֆրանսիայում»,-պատասխանեց Փարիզի ակադեմիայի ռեկտորը:
Գոհար ՀԱԿՈԲՅԱՆ
