«Ես չգիտեմ այդ լրագրողի կամ լրատվամիջոցի մտքի արգասիքն ինչքան կարող է գնալ: Դա կանխակալ եւ քաղաքականությունը վարկաբեկելու մտադրություն ունի: Պատվերներ կատարելու տեսակետից ապուշություններ են հրապարակվում»,- խորհրդարանում լրագրողների հետ զրույցում ասաց ՀՀ բնապահպանության նախարար Արծվիկ Մինասյանը`անդրադառնալով թերթերից մեկի այն հրապարակմանը, թե ինքը ՀԷԿ ունի:
Լրագրողների խնդրանքով նախարարն անդրադարձավ նաեւ պաշտոնեական դիրքի չարաշահման, կաշառք ստանալու, կաշառք տալու եւ ծառերի ապօրինի հատման դեպքերի առթիվ հարուցված քրեական գործերին: «Այս բացահայտումների հարցում ամենաշահագրգիռ կողմը նաեւ մենք ենք: Ներկայումս էլ տեսչական մարմինն իրականացնում է ստուգումներ շուրջ 4 անտառտնտեսությունում: Հարուցված գործը գտնում է Հատուկ քննչական ծառայության վարույթում: Տեսչական մարմինը 10 ստուգում է իրականացնում, որից 9-ը` հենց անտառհատումների ուղղությամբ: Մեր նպատակն է բացահայտել բոլոր իրավախախտումները, օժանդակել իրավապահ մարմիններին, քննչական մարմիններին, որպեսզի լիարժեք բացահայտումներ տեղի ունենան»:
Հիշեցնենք, որ ՀՀ բնապահպանության նախարարության նախկին բնապահպանական պետական տեսչության պաշտոնյաները խոշոր չափերով կաշառք են ստացել` «Հայանտառ» ՊՈԱԿ-ի «Սյունիքի անտառտնտեսություն» մասնաճյուղի «Արծվանիկ» անտառպետությունում ապօրինի հատված ծառերի իրական ծավալները չարձանագրելու դիմաց: ՀՀ հատուկ քննչական ծառայության քննիչի որոշմամբ` կաշառք ստանալու, կաշառք տալու և կաշառք տալուն օժանդակելու կասկածանքով ձերբակալվել է 4 անձ, այդ թվում` ՀՀ ԲՆ նախկին բնապահպանական պետական տեսչության պաշտոնյաներ եւ «Արծվանիկ» անտառպետության աշխատակիցներ:
Նախարարն ասում է` պաշտոնեական դիրքի չարաշահում թույլ տված անձինք բոլորը պետք է ենթարկվեն պատասխանատվության:
Մինչ այդ, ներկայացնելով 2018-ի բյուջեն, Արծվիկ Մինասյանն ասաց, որ ՀՀ բնապահպանության նախարարության բյուջեն եկող տարի կավելանա 750 մլն դրամով: Ընդհանուր առմամբ նախարարությունը կիրականացնի 18 ծրագիր։
Նելլի ԳՐԻԳՈՐՅԱՆ
