2016թ. ՀՀ ոստիկանության ՊՊԾ գունդը գրաված եւ մի շարք ծանր հանցագործությունների մեջ մեղադրվող «Սասնա ծռեր» խմբի անդամներից Արմեն Լամբարյանի, Աշոտ Պետրոսյանի, Կարո Եղնուկյանի, Խաչատուր Գիչյանի, Արթուր Մելքոնյանի, Տիգրան Սարգսյանի, Արթուր Սողոմոնյանի, Գառնիկ Հովակիմյանի, Հովհաննես Վարդանյանի, Վարդգես Գեւորգյանի եւ Մանվել Աթոյանի գործով հերթական դատական նիստը վերսկսվելուն պես այսօր դատավոր Արտուշ Գաբրիելյանը կողմերին տեղեկացրեց, որ ընդմիջման ժամանակ ամբաստանյալներից Կարո Եղնուկյանի ինքնազգացողությունը վատացել է, շտապօգնություն են կանչել:
Բժիշկներն արձանագրել են, որ նրա ճնշումը եղել է 220/120, ապա փոքր ինչ կայունացել է՝ դառնալով 160/100, սակայն անհրաժեշտություն կա նրան հիվանդանոց տեղափոխելու: Ինքնազգացողության վատացում է ունեցել նաեւ ամբաստանյալներից Խաչատուր Գիչյանը, որը Կարո Եղնուկյանի պես, մեղադրվում է զինված խմբին օժանդակելու մեջ: Նրա ճնշումն էլ եղել է 240/140: Գիչյանի ինքնազգացողությունը կարգավորվել է, նա ներկա է նիստին:
Դատավոր Արտուշ Գաբրիելյանն այնուհետեւ հայտարարեց, որ մերժում է Եղնուկյանի պաշտպանի կողմից գործով մեղադրող- դատախազ Պետրոս Պետրոսյանի դեմ այսօր ներկայացված ինքնաբացարկի միջնորդությունը: Իսկ դա նշանակում է, որ այդ գործով որպես մեղադրող-դատախազ շարունակելու է հանդես գալ Պետրոս Պետրոսյանը:
Լուիզա ՍՈՒՔԻԱՍՅԱՆ
