Հոգեբան Սամվել Խուդոյանի դիտարկմամբ, նախօրեին Արմավիրի «Մանուշակ» մանկապարտեզում տեղի ունեցածը եզակի դեպք է ու չպետք է սարսափեցնի հասարակությանը:
«Այսքան ժամանակ, ով էր լսել նման բան: Այդ եզակի դեպքը դեռ չի նշանակում, որ բռնության դեպքերը շատացել են: Կատարվածը մեզ չպետք է սարսափեցնի: Սեռական ոտնձգության դեպքեր էլ են լինում ու քիչ չեն այդպիսի դեպքերը, բայց էլի այլ երկրների հետ համեմատած՝ Հայաստանում քիչ են»,- այսօր «Հենարան» ակումբում ասաց հոգեբանը:
Նրա խոսքով, ինքը երեսուն տարուց ավելի է՝ պսիխոթերապիայով է զբաղվում ու չի հանդիպել որեւէ դեպքի, երբ երեխայի բռնության տրավման, հատկապես սեռական ոտնձգության, ազդի նրա կենսագրության, հիվանդության ձեւավորման վրա. «Արմավիրում կատարված դեպքը զգոնություն պետք է առաջացնի, չգիտեմ՝ ինչ հիմքերով է կատարվել այդ գործողությունը, ինչ-որ խնդիրների հետեւանքով պետք է կատարված լինի»:
Ըստ նրա՝ Հայաստանում ոչ այնքան ընտանեկան, երեխաների բռնության խնդիրներ ունենք, որքան խնդիր ունեցող անձի գերխնամքի խնդիր. «Ինչի բացասական հետեւանքներին անընդհատ կարելի է հանդիպել, մեր հոգեբանական խնդիրներով երեխաների գերխնամքն ավելի լուրջ խնդիր է, քան թե բռնությունը»:
Փաստաբան Գագիկ Թովմասյանն էլ նկատեց, որ 1996-ին Հայաստանում ընդունված երեխաների իրավունքների մասին օրենքի 23 հոդվածում անհստակություն կա. «Այստեղ հստակ նշված չէ՝ կոնկրետ ինչ գործառույթներ ունի ՀՀ_ն երեխաների պաշտպանության, անվտանգության ապահովման առումով»:
Արփինե ՍԻՄՈՆՅԱՆ
