Այսօր կառավարության նիստի օրակարգին անցնելուց առաջ վարչապետ Կարեն Կարապետյանը անդրադարձավ Doing Business զեկույցում Հայաստանի գրանցած նահանջին: Հիշեցնենք, որ Հայաստանը այս տարվա Doing Business զեկույցում 9 կետով անկում է գրանցել:
Կարեն Կարապետյանն անդրադառնալով այս խնդրին, նշեց, որ թեեւ Հայաստանը զեկույցում տնտեսության ազատության ցուցանիշով առաջ է գնացել՝ 54-ից դառնալով 33-րդը, այնուամենայնիվ դա բավարար չէ, որ ընդհանուր տեղաշարժ արձանագրվեր:
Վարչապետի ներկայացմամբ՝ անցյալ տարի Հայաստանի արձանագրած 0,59% տնտեսական աճը բավարար չի եղել մրցակից երկրների խիստ մրցակցության պայմաններում առաջընթաց գրանցել: Ուստի, ինչպես ասաց վարչապետը, 2018-ից սկսած՝ Doing Business զեկույցի յուրաքանչյուր ցուցիչի համար պատասխանատու է լինելու տվյալ ոլորտը համակարգող գերատեսչության ղեկավարը:
Վարչապետը հանձնարարեց ստեղծել միջգերատեսչական աշխատանքային խումբ, որտեղ ներառված կլինեն բոլոր գերատեսչություններից ներկայացուցիչներ: Այս աշխատանքային խումբը, ըստ վարչապետի, պետք է ղեկավարի որեւէ գերատեսչության փոխնախարար:
Նելլի ԲԱԲԱՅԱՆ
