Խորհրդարանում 2018 թվականի բյուջեի նախագծի քննարկումների ժամանակ «Ծառուկյան» խմբակցության պատգամավոր, ԱԺ փոխնախագահ Միքայել Մելքումյանը Ֆինանսների նախարարի առաջին տեղակալ Ատոմ Ջանջուղազյանից հետաքրքրվեց` 2018 թվականին ՀՀ պետական պարտքը կգերազանցի՞ սահմանված առավելագույն 60%-ի շեմը: Պատգամավորը հիշեցրեց` ընդհանուր պարտքն այսօր արդեն կազմում է 58,8 տոկոս: Նա նաեւ խնդրեց գնահատել մինչ այժմ տրամադրված վարկերի ու դրամաշնորհների արդյունավետությունը: «Ո՞ւր ենք գնում այսպիսի պարտքերի շալակով»,- հարցրեց նա:
Փոխնախարարը նշեց`վարկերի եւ դրամաշնորհների ծախսման արդյունավետությունը ճիշտ այնպիսին է, ինչպես բյուջեով նախատեսված այլ ծախսերի օգտագործումը: Միքայել Մելքումյանը ենթադրեց`այսինքն, անարդյունավետ: Փոխնախարարը հիշեցրեց գլոբալ տնտեսական ճգնաժամը եւ ՀՀ-ի համար տնտեսական ցնցումը՝ պայմանավորված ՌԴ-ի տնտեսական վիճակով: «Ինչ վերաբերում է պարտքի պնդմանը, թե անցնելու է, թե ոչ, ապա այս ծրագրերում անցումը չի նախատեսվում»,-ասաց նա`հավելելով, որ սահմանափակումները նախատեսված են կառավարության պարտքի համար, ոչ թե ընդհանուր:
Մանրամասները`տեսանյութում
Միքայել Մելքումյանը խնդրեց հստակ ասել` ընդհանուր պարտքը անցնելու է 60%: Ատոմ Ջանջուղազյանն ասաց`59% է կանխատեսվում:
«Ես նշեցի ճգնաժամերի մասին, վստահ եմ, որ այդ պայմաններում տրամաբանական է այն վարքագիծը, որ ունենար կառավարությունը`չգնալ ծախսերի կրճատման եւ չխորացնել առանց այդ էլ ծանր վիճակը: Եթե տնտեսությունը չի գեներացնում, ստիպված է պարտք վերցնել: Եթե չգնար, ավելի վատ հետեւանք կլիներ: Պատկերացրեք, եթե նվազեցնեինք աշխատավարձը, ի՞նչ վիճակ կլիներ»,- հավելեց փոխնախարարը`չհամաձայնելով պատգամավորի այն դիտարկմանը, որի ինքն անարդյունավետ գնահատեց վարկերի եւ դրամաշնորհների ծախսը:
Նելլի ԳՐԻԳՈՐՅԱՆ
