ՀՀԿ խոսնակ Էդուարդ Շարմազանովը նորմալ է համարում բյուջեի նախագծի վերաբերյալ քննադատությունները:
«Վերջին տասը տարում խորհրդարանում եմ եղել ու չեմ լսել կամ տեսել ընդդիմադիր որեւէ գործչի, որը գովաբանի կամ դրական բաներ ասի բյուջեի նախագծի մասին, դա էլ բնական է, ընդդիմությունը քննադատում է, իսկ իշխանությունն աշխատում ու պատասխանում քննադատություններին, բայց վատ չէր լինի, եթե մի օր ՀՀ քաղաքական ներկապնակում հայտնվեր քաղաքական ուժ, որը նաև այլընտրանքային բյուջեի նախագիծ ու ծրագրեր ներկայացներ, որն ընդունված է աշխարհի զարգացած երկրներում»,-այսօր ՀՀԿ ԳՄ նիստից հետո լրագրողներին ասաց ՀՀԿ խոսնակ Էդուարդ Շարմազանովը:
Նրա խոսքով, եթե խոսենք ցանկություններից, բնականաբար, դրանք ավելի մեծ են, բայց սա ռեալիստական բյուջե է:
Անդրադառնալով Կատալոնիայի շուրջ տեղի ունեցող իրադարձություններին՝ ՀՀԿ խոսնակն ասաց, որ ոչ մի նմանություն չկա Արցախի հետ ու չպետք է այն նույնացնել. «Որեւէ կապ չունի Արցախի հետ, ադրբեջանական այն սենսացիոն գնահատականները, թե աշխարհը չի ճանաչում Կատալոնիան, ուրեմն չի ճանաչի նաեւ Արցախը, անհեթեթ ու ծիծաղելի են: Ինչ վերաբերում է տարածքային ամբողջականությանը՝ ինչ կապ ունի Արցախը Ադրբեջանի տարածքային ամբողջականության հետ»:
Արփինե ՍԻՄՈՆՅԱՆ
