Նյու Յորքի թաղամասերից մեկում` հարավային Մանհեթենում, Առևտրի համաշխարհային կենտրոնից ոչ հեռու տեղի ունեցավ ահաբեկչական հարձակում: Ահաբեկիչը բեռնատար ավտոմեքենան ուղղեց դեպի ճանապարհի հեծանիվների համար նախատեսված հատվածը՝ վրաերթի ենթարկելով անցորդներին ու հեծանվորդներին ու բախվելով դպրոցական ավտոբուսի հետ:
«Սա ահաբեկչական գործողություն էր ընդդեմ անմեղ քաղաքացիների»,- հայտարարել է Նյու Յորքի քաղաքապետ Բիլ դե Բլասիոն:
Ոստիկանությանը հաջողվել է վնասազերծել և ձերբակալել ահաբեկչին, ով այնուհետև տեղափոխվել է հիվանդանոց:
«Բեռնատարի 29 ամյա վարորդը դուրս է եկել ավտոմեքենայից, նրա մոտ գտել են երկու ատրճանակ: Ոստիկանության աշխատակիցը, նրա հետ փոխհրաձգության մեջ մտնելով, կարողացել է վնասազերծել նրան»,- ասել է Նյու Յորքի ոստիկանության ներկայացուցիչ Ջեյմս Օնեյլը:
Այս ամենի ականատես են եղել բազմաթիվ մարդիկ:
«Միշտ թվում է, որ նման մի երևույթ քեզանից հեռու է, սակայն երբ դրանք տեղի են ունենում քո կողքին, ապա դա շոկային է: Չեմ ցանկանա նման բան տեղի ունենա մեկ ուրիշի հետ»,- ասում է ականատես Էլիզաբեթ Չերնոբելսկին:
Ոստիկանության հաղորդմամբ, ահաբեկչության իրականացման մեջ է կասկածվում 29 ամյա ազգությամբ ուզբեկ Սայֆուլո Սայիպովը, ով Միացյալ Նահանգներ է ներգաղթել յոթ տարի առաջ:
Մանրամասներին կարող եք ծանոթանալ՝ «Ամերիկայի ձայն»-ի կայքում:
