Արթուր Այվազյանի՝ Մանախի, պաշտպան Հայկ Ալումյանը պնդում է, որ «Ելքի» համակիր Հայկ Սարգսյանը դատախազության հովանավորչության տակ է:
Հիշեցնենք, որ Արթուր Այվազյանին մեղադրանք է առաջադրվել, որ 31.03.2017թ ժամը 22:40-ի սահմաններում Անդրանիկի փող 53 շենքի բակում անթաքույց արհամարհանք դրսևորելով հասարակության նկատմամբ, «ԵԼՔ» դաշինքի համակիր Հայկ Սարգսյանի նկատմամբ բռնություն գործադրելով՝ կոպիտ կերպով խախտել է հասարակական կարգը, որի ընթացքում պահել է ապօրինի ձեռք բերած գործարանային արտադրության 5,6 մմ տրամաչափի օղակաձև բոցավառման որսորդական սպորտային ռազմամթերք հանդիսացող 7 փամփուշտներով լիցքավորված ինքնաշեն ակոսափող թմբուկավոր հրազեն հանդիսացող ատրճանակ:
«Դատախազությունը մշտական հովանավորչության տակ է վերցրել այս գործով տուժող անձին, հիմա տուժողի ներկայացուցիչը դատախազին բացարկ ներկայացնելով փորձում է տպավորություն ստեղծել, որ այդպես չէ, թե դա ինչ նպատակ է հետապնդում, ով՝ ում, ինչ է ցույց տալիս, դա արդենք քաղաքական ոլորտից է, ես չեմ կարող ասել:
Մենք պետք է դատախազին բացարկ հայտնեինք, չհայտնեցինք, որովհետեւ այստեղ նստած դատախազը չէ ամեն ինչ անում, նա գնա, մեկ ուրիշ գա, էլի նույնն է լինելու: Սա դատախազության հստակ կողմնորոշումն է, հովանավորել այն սուբյեկտին, որը տուժողի կարգավիճակում է: Հովանավորչությունն ակնհայտ է, ինչ այստեղ հիմա տեղի է ունենում, փորձ է քողարկել այդ հովանավորչությունը, այս գործով մի բան է միայն երեւում՝ նրանց սերտ համագործակցությունը»,- ասաց փաստաբանը:
Արթուր Այվազյանն էլ հավելեց. «Ես պնդում եմ, որ ՀՀ դատախազությունը, մեղադրանք պաշտպանող դատախազը, եթե իր գործառույթներն իրականացներ, այս գործը չէր հասնի դատարան: Կոնկրետ դատախազ Մովսիսյանը շահագրգռված է այս գործի ելքով»:
Արփինե ՍԻՄՈՆՅԱՆ
