«Ազոխի քարանձավ» պետական բնապատմական արգելոցի մի որոշակի հատված բաց կլինի այցելուների համար: Այս մասին Aravot.am-ի հետ զրույցում ասաց Արցախի Հանրապետության մշակույթի երիտասարդության հարցերի և զբոսաշրջության նախարար Սերգեյ Շահվերդյանը: «Քարանձավը 2014 թվականից պետական բնապատմական արգելոցի կարգավիճակ է ստացել, և այնտեղ պեղումները պարբերաբար շարունակվում են: Այն այժմ փակ է այցելուների համար, չնայած որ ոմանց հաջողվում է ներս մտնել, ինչը մեր անուշադրության հետևանքն է: Առաջիկայում միջոցներ կձեռնարկվեն և մի որոշակի հատված բաց կլինի հանրության համար»,- պարզաբանում է նախարարը` հավելելով, որ այցելուների հաճախակի մուտքը քարանձավի ներս վնասում է քարանձավի ներքին էկոհամակարգի հավասարակշռությունը:
Արցախի պետական պատամաերկագիտական թանգարանի տնօրեն Մելանյա Բալայանը` խոսելով Ազոխի քարանձավում իրականացված պեղումների և գտածոների վերաբերյալ նշում է, որ քարանձավում առաջին ուսումնասիրությունները իրականացվել են 1968 թվականին: «Խորհրդային տարիներն էին և ամեն ինչ վերահսկվում էր Ադրբեջանի կողմից: Արդյունքում պեղումների ընթացքում գտնված նյութերը` այդ թվում և 300 հազար տարվա վաղեմության նեանդերթալ նախամարդու ծնոտոսկրը տարվել են Ադրբեջան և այժմ ցուցադրվում են Ադրբեջանի պատմության թանգարանում:
Սակայն 2002 թվականին եվրոպացի հնագետների կողմից վերսկսած պեղումների արդյունքում գտնված աշխատանքային գործիքները և կենդանիների մնացորդները հանձնվել են այս թանգարանին և ցուցադրվում են մեզ մոտ»,- մանրամասնում է թանգարանի տնօրենը:
Դավիթ ԱԲԱՂՅԱՆ
