Aravot.am-ը «Դեմ ենք օտարալեզու դպրոցների բացմանը» շարժման անդամ Արմեն Հովհաննիսյանից հետաքրքրվեց` ի՞նչ կարծիքի է «Նախադպրոցական կրթության մասին օրենքի նախագծի վերաբերյալ, արդյոք վտանգավոր կետեր չի՞ տեսնում այդ օրենքում:
Մասնավորապես նախագծի 8-րդ հոդվածի մաս 3-րդում նշված է . «Օտարերկրյա քաղաքացու կամ Հայաստանի Հանրապետության քաղաքացիություն չունեցող կամ երկքաղաքացու, ինչպես նաև այն դեպքում, երբ ծնողներից մեկը Հայաստանի Հանրապետության քաղաքացի է, մյուսը` օտարերկրացի, երեխայի ուսուցման լեզվի ընտրությունը կատարում է ծնողը (նրանց օրինական ներկայացուցիչը)՝ անկախ ազգային պատկանելությունից»:
Իսկ 10-րդ հոդվածի 4-րդ մասի կետ 2.1-ում ասվում է. «Ուսումնական հաստատությունները կարող են միջազգային նախադպրոցական կրթական ծրագրեր իրականացնել և օտար լեզուներով կրթություն կազմակերպել Հայաստանի Հանրապետության կառավարության որոշմամբ։ Ուսումնական հաստատությանը օտար լեզվով կրթություն կազմակերպելու թույլտվություն տալու կարգը հաստատում է Հայաստանի Հանրապետության կառավարությունը։
Օտար լեզվով նախադպրոցական կրթական ծրագրեր կարող են իրականացնել բացառապես ոչ պետական ուսումնական հաստատությունները, ինչպես նաև միջպետական, միջկառավարական համաձայնագրերով ստեղծված ուսումնական հաստատությունները»:
«Դեռ օտարալեզու դպրոցների դեմ պայքարի թեժ շրջանում դավադիրները, իսկ ես այս ամենը հայերենի դեմ մտածված և կազմակերպված գործելակերպ եմ համարում, փորձում էին թյուրիմացության մեջ գցել հանրությանը, պնդելով, թե փոփոխությունը վերաբերվում է միայն ավագ դպրոցին։ Դեռ այն ժամանակ մենք նշում էինք, որ օտար լեզուն «մայրենի լեզվի պես» իմանալու համար օտարալեզու կրթության շրջանակը օբյեկտիվորեն պիտի ընդլայնվի՝ մինչ մսուր և ընտանիք։ Այս օրինագիծը վառ ապացույցն է, որ այդպես էլ կա: Սա նույն անընդունելի, մերժելի գծի շարունակությունն է նույն շրջանակի կողմից»,-ասաց Արմեն Հովհաննիսյանը։
Թեմայի վերաբերյալ իր ֆեյսբուքյան էջում մտահոգություն է հայտնել «Ելք» դաշինքի Երեւանի ավագանու անդամ Արայիկ Հարությունյանը: Նրա ձեւակերպմամբ, օտարալեզվությունը պաշտոնապես ցանկանում են մտցնել մանկապարտեզներ:
Գոհար ՀԱԿՈԲՅԱՆ
Ներկայիս կրթության նախարարից ամեն ինչ էլ սպասելի է: Ենթադրում եմ, որ նա իր դաշնակցական ընկերների հետ սեղանի շուրջը նստած ժամանակ ազգային-հայրենասիրական երգեր երգելիս կլինի, բայց հենց գալիս է աշխատանքի, սկսում է օտարալեզու կրթությունը խթանելու մասին օրենքի նախագծեր կամ էլ հայեցակարգեր մշակել: Հիմա էլ հերթը հասել է նախադպրոցական կրթությունը ապազգային դարձնելուն: Ամեն անգամ մի քանի ամսով նախարար է աշխատում, պոպուլիստական ելույթներ ունենալով` կրթության ոլորտի հերն անիծում ու դուրս գալիս: Հետո նորից է գալիս նախարար աշխատելու…