Մալաթիա-Սեբաստիա վարչական շրջանների ընդհանուր իրավասության դատարանում «Ելք» դաշինքի համակրի նկատմամբ բռնություն գործադրելու գործով դատական նիստին այսօր տուժողը դատարան չէր ներկայացել: Ըստ նրա ներկայացուցիչ Նիկոլայ Բաղդասարյանի՝ վնասվածք ունենալու պատճառով:
Հիշեցնենք, որ Արթուր Այվազյանին՝ Մանախ մականունով, մեղադրանք է առաջադրվել, որ նա 31.03.2017թ ժամը 22:40-ի սահմաններում Անդրանիկի փող 53 շենքի բակում անթաքույց արհամարհանք դրսևորելով հասարակության նկատմամբ, «ԵԼՔ» դաշինքի համակիր Հայկ Սարգսյանի նկատմամբ բռնություն գործադրելով՝ կոպիտ կերպով խախտել է հասարակական կարգը, որի ընթացքում պահել է ապօրինի ձեռք բերած գործարանային արտադրության 5,6 մմ տրամաչափի օղակաձև բոցավառման որսորդական սպորտային ռազմամթերք հանդիսացող 7 փամփուշտներով լիցքավորված ինքնաշեն ակոսափող թմբուկավոր հրազեն հանդիսացող ատրճանակ:
Տուժողի ներկայացուցիչ Նիկոլայ Բաղդասարյանը դատախազ Սմբատ Մովսիսյանի բացարկի վերաբերյալ միջնորդություն ներկայացրեց՝ պատճառաբանելով, որ նա կանխակալ վերաբերմունք ունի գործով: Իր միջնորդությունը փաստաբան Բաղդասարյանը հիմնավորեց այսպես. «Քրեական գործի նախաքննության ավարտից հետո գործի նյութերին ծանոթանալով՝ միջնորդություն եմ ներկայացրել վարույթ իրականացնող մարմին, որ քրեական գործը քննվել է թերի ու առաջ չի քաշվել վարկած, որ Արթուր Այվազյանի դիտավորությունն ուղղված է եղել խոչընդոտել «Ելքի» անդամների քարոզչությունը»:
Ըստ փաստաբանի՝ իր միջնորդությունը մերժվել է՝ անհիմն լինելու պատճառաբանությամբ, ինչի մասին տուժող կողմը տեղեկացել է օրեր անց, արդյունքում՝ զրկվել վարույթ իրականացնող մարմնի որոշումների բողոքարկման կարգից:
Դատախազն էլ ասաց, որ միջնորդությունն անհիմն է ու ենթակա է մերժման: Դատարանը հեռացավ խորհրդակցական սենյակ՝ միջնորդության վերաբերյալ որոշում ընդունելու: Հաջորդ դատական նիստը նշանակվեց նոյեմբերի քսանյոթին:
Արփինե ՍԻՄՈՆՅԱՆ
