«Տարկետման իրավունքը հանելու մասին որոշումը կործանարար կլինի գիտության համար», -«Նոյյան տապան» մամուլի սրահում լրագրողների հետ հանդիպմանը հայտարարեց Հանուն գիտության զարգացման նախաձեռնության անդամ Սևակ Գրիգորյանը:
Նա տեղեկացրեց, որ նախաձեռնությունը երկու շաբաթ առաջ են ստեղծել՝ ոգեշնչված 2014-ին կազմակերպված համանուն շարժմամբ՝ մտահոգ ուսանողներով: Շարժման անդամը տեղեկացրեց, որ իրենք կազմակերպել են նաև ստորագրահավաք. ունեն մոտ 2000 ստորագրություն:
Ըստ Սևակ Գրիգորյանի՝ արդեն զարգացում կա. խթանել են հանրային քննարկմանը, քանի որ հարցը սկզբից ծածկված էր, և անգամ չէր էլ նշվում, որ տարկետման վերացումը տարածվում է նաև ներկայիս ուսանողների վրա. «Համամիտ չեմ, որ այս որոշումը կլուծի սոցիալական արդարության խնդիրը: Համամիտ չեմ նաև այն պատճառաբանությանը, թե բոլորը հավասար են և պետք է ծառայեն ու իրենց պարտքը տան հայրենիքին: Հենց մենք դրան ենք դեմ: Ասում են՝ տարկետումը կդառնա բանակից խուսափելու միջոց, բայց խուսափողը, մեկ է, գտնելու է խուսափելու ճանապարհը»:
Հանուն գիտության զարգացման նախաձեռնության անդամ, ԵՊՀ արևելագիտության ֆակուլտետի մագիստրանտ Վահան Կոստանյանը նշեց, որ ՀՀ ԿԳ և ՊՆ նախարարներին ուղղված նամակում համառոտ կերպով ներկայացրել են իրենց մտահոգությունները, նաև հիմնավորումներ:
Վահան Կոստանյանը հավաստիացրեց. «Միայն զինված ուժերում չէ, որ այս ծառայությունը կարելի է մատուցել պետությանը: Խնդիրը պետություն կերտելու տեսլականի մեջ է: Եթե ուզում ենք ռազմականացված պետություն ունենալ, դա մի հարց է, բայց եթե հայտարարում ենք երկրի թոփ դեմքերի բերանով, որ մենք ինտելեկտուալ Հայաստան ենք կառուցելու, սա արդեն խնդրի մյուս կողմն է: Այդտեղ հակասություն է առաջանում»:
Անդրադառնալով այն պատճառաբանություններին, թե մենք պատերազմի մեջ գտնվող պետություն ենք, հետևաբար այս փոփոխություններն արդարացված են, Վահան Կոստանյանն ասաց. «21-րդ դարում պայքարում են ոչ միայն անձինք ու զինվորները, որոնք կանգնած են սահմանին, այլև նորագույն տեխնիկան: Պայքարը գնում է նաև օնլայն հարթակում: Բերեք ասպիրանտական թեկնածուական թեմաները որոշակիորեն հարմարեցրեք այսօրվա իրավիճակին, որպեսզի դրանք կիրառական նշանակություն ունենան»:
Վահան Կոստանյանն ընդունեց, որ գիտության ոլորտում գոյություն ունի կոռուպցիա, բայց հավաստիացրեց, որ այս նախագիծը ոչ թե պատճառները, այլ հետևանքներն է վերացնելու: Նա առաջարկեց ակադեմիական տարկետումը պահպանել այն տեսքով, որն ունի այսօր և նշեց, որ իրենք ձեռք են մեկնում համապատասխան գերատեսչություններին այդ կոռուպցիոն ռիսկերի դեմ պայքարելու համար:
Ֆիզմաթ գիտությունների թեկնածու, ԵՊՀ ռադիոֆիզիկայի ֆակուլտետի գիտաշխատող Հայկ Զաքարյանը վստահեցրեց, եթե այս օրենքն ընդունվի, մարդիկ ասպիրանտ կամ թեկնածու կարող են դառնալ միայն 29, 30 տարեկանում, և այդ ժամանակ սոցիալական խնդիրը նրանց համար շատ ավելի սուր կլինի. «Եթե հիմա 20 տոկոսն է մնում գիտության մեջ, այս օրենքի ընդունումից հետո այդ թիվը կնվազի»:
Այն հավաստիացումներին, թե գիտությամբ զբաղվել ցանկացողը բանակում ծառայելուց հետո էլ դա կանի, Հայկ Զաքարյանն այսպես արձագանքեց. «Դա այդպես չէ. մարդ դառնում է գիտնական՝ միջավայրից ելնելով: Համակարգն այնպիսին պիտի լինի, որ ուսանողին կրթի, մեծացնի ու դարձնի գիտնական: Եթե միջավայրը չլինի, հավաստիացնում եմ, գիտության մեջ մնացողների 20 տոկոսը կնվազի՝ կհասնի 1-2-ի: Եթե օրենքն ընդունվի, առաջիկա երկու-երեք տարվա ընթացքում ոչ մի ֆակուլտետում՝ մանավանդ բնագիտական, որտեղ տղաների թիվը մեծ է, ո՛չ ասպիրանտ, ո՛չ մագիստրոս չի լինի, բակալավրիատի ուսանողերի թիվն էլ կնվազի: Դա մեծ խնդիր է համալսարանի համար: Կնվազի նաև դասախոսների թիվը»:
Հարցին՝ արդյոք պրոֆեսորադասախոսական կազմը միացե՞լ է նախաձեռնությանը, Հայկ Զաքարյանը պատասխանեց՝ տեղեկացնելով, որ իրենց ստորագրահավաքին միացել են ԵՊՀ ռադիոֆիզիկայի, մաթեմատիկայի, ֆիզիկայի ֆակուլտետների դեկանները, փոխդեկանները, ամբիոնի վարիչներ:
Վահան Կոստանյանն էլ այս առիթով հավելեց, որ անձնական քննարկումներում պրոֆեսորադասախոսական կազմն իրենց հետ համամիտ է, բայց երբ գործը հասնում է հրապարակային ելույթներին, շատերը հրաժարվում են իրենց դիրքորոշումը հայտնել:
Տաթև ՀԱՐՈՒԹՅՈՒՆՅԱՆ
Լուսանկարը՝ «Նոյյան տապան»-ի
