«Հուսամ առողջությունս կհերիքի, որ այս պատերազմում էլ հաղթենք ու երկիրը մաքրենք ազգադավերից»,-«Սասնա ծռերի» գործով դատական նիստում այսօր ամբաստանյալների ինքնության ճշտման ժամանակ, երբ դատավոր Մեսրոպ Մակյանը հետաքրքրվում էր առողջական վիճակի մասին, ասաց ամբաստանյալներից Պավել Մանուկյանը: Նա էլ, ինչպես գործով ամբաստանյալ որդին՝ Արամ Մանուկյանը, նշեց, որ ծնվել է ՀՀ մարզ Արցախի քաղաք Ստեփանակերտում:
Ամբաստանյալներից Արայիկ Խանդոյանի ինքնության ճշտման ժամանակ էլ վերջինս ասաց, որ հինգ երեխա ունի՝ ամենամեծը 24 տարեկան է, իսկ կրտսերը՝ 10: Դատավորը կրկնակի հարցով ճշտեց՝ «5՞»:
-Այո, հինգ…զարմանո՞ւմ ես, ցավդ տանեմ,-պատասխանեց Խանդոյանը:
-Չէ, ուրախանում եմ,-ասաց դատավոր Մեսրոպ Մակյանը:
-Ապրես,-արձագանքեց ազատամարտիկը:
Երկխոսությանը միջամտեց ամբաստանյալներից Պավել Մանուկյանը եւ կատակեց. «Որ չխանգարեինք, մի հատ էլ կունենար»: Դատավորն էլ հուսադրեց. «Կունենաք, կունենաք»:
Ինչ վերաբերում է առողջական վիճակին, Արայիկ Խանդոյանը դատարանին հայտնեց, որ 19 անգամ Արցախյան ազատամարտի ժամանակ է վիրավորվել, 2 անգամ էլ՝ ՊՊԾ գնդի գրավման ժամանակ:
Ամբաստանյալներից Գագիկ Եղիազարյանն էլ դատավորին ասաց՝ ամուսնացած չէ, բայց կհասցնի՝ «ի հեճուկս ցեղասպան ռեժիմի»: Ապա Գագիկ Եղիազարյանը ՀՀ-ն Ռուսաստանի գաղութ անվանեց ու գոհունակություն հայտնեց, որ իր հայրենի գյուղում բնակվում է ազատամարտիկի անվան փողոցում, ոչ թե Սեւանում գտնվող «Կարմիր բանակի» փողոցում, որտեղ հաշվառված է ամբաստանյալներից Էդվարդ Գրիգորյանը:
Այնուհետեւ Մեսրոպ Մակյանը ցանկանում էր անցնել հաջորդ դատավարական գործողությանը, երբ ամբաստանյալներից Սմբատ Բարսեղյանը տեղից բղավեց «բա ե՞ս»՝ ակնարկելով, որ իրեն «մոռացել են»: Իր ինքնության ճշտման ժամանակ էլ Բարսեղյանը դժգոհեց, որ մինչեւ ՊՊԾ գնդի գրավումը ԵՊՀ-ում է սովորել: Նրա խոսքով՝ օրենքը թույլ է տալիս կալանավայրում ուսումը շարունակել, մինչդեռ իր այդ իրավունքը սահմանափակում են: Նիստը կրկին ընդմիջվեց:
Ի դեպ, դատավոր Մեսրոպ Մակյանը, դատավոր Արթուր Օհանյանի պես, ուշադրություն չի դարձնում այն փաստին, որ ամբաստանյալներն իր գալուն պես ոտքի չեն կանգնում եւ խոսում են տեղից՝ կրկին առանց ոտքի կանգնելու: Այս դեպքերում գործով անջատված մասերից մեկով նախագահող դատավոր Արտուշ Գաբրիելյանը մշտապես սանկցիաներ էր կիրառում ամբաստանյալների հանդեպ:
Լուիզա ՍՈՒՔԻԱՍՅԱՆ
իսկ սպանուած հայորդիները քանի՞ հատ երեխայ ունէին… իսկ անոնք մի հատ ել չեն ունենալու, հաստատ…