Արդարադատության նախարար Դավիթ Հարությունյան այսօր ԱԺ-ում լրագրողների հետ զրույցում անդրադարձավ աղմուկ բարձրացրած Ընտանեկան բռնության կանխարգելման մասին նախագծին:
Հայտնի է, որ ՀՀԿ-ականներից շատերը դեմ են այս նախագծին եւ խորհրդի նիստում քննարկումից հետո սպառնացել են, որ եթե այս տեսքով մնա, իրենք դեմ են քվեարկելու: Թե արդյոք ՀՀԿ-ականներին հաջողվե՞լ է համոզել, թե նախագծի դրույթներն են փոխվել՝ Դավիթ Հարությունյանը պատասխանեց. «Բնականաբար, այս օրենքը քանի որ արժանացավ բուռն արձագանքի մեր հանրության կողմից, յուրաքանչյուր բառը եւ յուրաքանչյուր տառը փորձվեց մեկնաբանվել եւ մեկնաբանվել երբեմն ոչ ողջամիտ: Բայց յուրաքանչյուր օրենք, որը գրվում է, որոշակի հիմք է ունենում»:
Նախարարը նշեց, որ երբեմն օրենքի նախագծի քննարկումները հասցվում էին աբսուրդի, թե՝ երեխայիս դուրս չթողնեմ գնա՝ արդյոք ազատությունից զրկո՞ւմ եմ եւ այլն: Դավիթ Հարությունյանն ասաց, որ շատ քննադատություններ հիմնավորված չէին, եթե այդպես տարածական մեկնաբանություններ լինեին, Քրեական օրենսգիրքն էլ կարող էր ոչ ողջամտորեն մեկնաբանվել. «Շատ դժվար է մտահոգությունները փարատել, եթե մտահոգված են, ուստի փորձում եմ հիմա ձեւակերպումները փոխելով ցույց տալ, որ մտահոգությունները տեղին չեն: Հիմա որոշակի աշխատանք տարվում է, որպեսզի փարատվեն կասկածները, որ օրենքը ոչ ողջամտորեն չմեկնաբանվի»:
Հարցին՝ ԱԺ փոխխոսնակ Էդուարդ Շարմազանովն էլ նշեց, որ մենք ավանդական ընտանիքների ամրության կողմնակիցն ենք եւ ապաստարանների, բազմաթիվ դրույթների հետ կապված մտահոգություններ դեռ կան, այսինքն, չե՞ք փարատել ՀՀԿ-ականների մտահոգությունները՝ Դավիթ Հարությունյանը պատասխանեց, որ վաղաժամ եզրակացություններ պետք չի անել, նախ պետք է ներկայացվեն փոփոխությունները, որոնք արվել են նախագծում, նոր եզրակացության գալ: Նախարարը նշեց, որ ՄԻԵԴ-ի նախադեպային որոշումներ կան, որ երկիրը քայլեր չի ձեռնարկել՝ պաշտպանելու իր զոհին եւ անկախ նրանից՝ մենք կընդունեք օրենք, չենք ընդունի, երկիրն ունի պատասխանատվություն. «Մենք ԵԽ անդամ ենք եւ մենք պարտավոր ենք կատարել դատարանի որոշումները: Խնդիրը չեմ ուզում պարզունակ դարձնենք եւ դարձնենք ԵՄ-ի հետ հարաբերությունների հենք: Սա մեր պարտականությունն է վաղուց արդեն եւ մենք բազմաթիվ միջազգային փաստաթղթեր ստորագրել ենք այս առումով՝ սկսած 93-ից»:
Դավիթ Հարությունյանը հայտարարեց՝ «Օրենքի դրույթները էապես չեն փոխվելու, միայն հստակեցվելու են, որ մտահոգությունները իմ գործընկերների, այդ թվում՝ ՀՀԿ-ական փարատվեն»:
Լրագրողները հետաքրքրվեցին՝ որպես կանոն, ՀՀԿ-ականները կառավարության օրինագծերին սովորաբար այսպես չեն ընդդիմանում, սպառնում, որ դեմ կքվեարկեն, արդյո՞ք այս պահվածքը կապված է ԵՄ-ի հետ առաջիկայում ստորագրվելիք փաստաթղթի հետ՝ Դավիթ Հարությունյանը պատասխանեց, որ ՀՀԿ-ականները բազմիցս օրենքների շուրջ բուռն քննարկումներ են ունեցել, սա միակ դեպքը չէ: Բազմաթիվ խնդիրներ եւ բուռն քննարկումներ եղել են նաեւ Ընտրական օրենսգրքի քննարկման ժամանակ:
Այնուամենայնիվ, թե խորհրդի նիստում ՀՀԿ-ականները սպառնացե՞լ են, որ դեմ ենք քվեարկելու, եթե այսպես մնաց՝ Դավիթ Հարությունյանը պատասխանեց, որ կոնկրետ նման ձեւակերպում չի հիշում, բայց ասվել է, որ այս ձեւակերպումով անթույլատրելի է, չի կարելի քվեարկել կողմ:
Ինչ վերաբերում է տնտեսական եւ հոգեբանական բռնություններին, Դավիթ Հարությունյանն ասաց, որ դրանք դուրս չեն գա օրենքից, որովհետեւ այդ դեպքում անիմաստ կլիներ, հիմնական բռնության տեսակը ֆիզիկականն է, բայց դրան նախորդում է հոգեբանականը: Այս դրույթների ձեւակերպումները որոշակիորեն կփոխվեն՝ մտահոգությունները փարատելու համար:
Դավիթ Հարությունյանն ասաց, որ Վրաստանն ընդունել է օրենքը, 3 տարի է՝ գործում է եւ չենք կարող ասել, որ վրացական ավանդական ընտանիքի արժեքները էապես տարբերվում են հայկական ավանդական ընտանիքի արժեքներից, իսկ վրացիները համարում են, որ այս տարիներին էական հաջողությունների են հասել:
Հանրային խորհրդում Փաստաբանների պալատի նախագահ Արա Զոհրաբյանն ասել էր, որ մեր հայերը կարող են լավ լուծում գտնել եւ երբ հայրը արտագնա աշխատանքի կգնա, կնոջը, երեխային կտա ապաստարաններ, որ անվճար ապրեն, մինչեւ գա: Այս առնչությամբ Դավիթ Հարությունյանը պատասխանեց. «Ես ցավում եմ, որ որեւէ փաստաբան կարող է իր ուղեղի ճկունությունն օգտագործել այդ ձեւով այլասերելու ցանկացած օրենք: Սա ինձ համար ցավալի է՝ որպես երեւույթ»:
Հռիփսիմե ՋԵԲԵՋՅԱՆ
