Հայաստանում գյուղատնտեսությունը զարգացած է, բայց հետագա աճի մեծ ներուժ ունի: Այս մասին «ՌԻԱ Նովոստիի» հետ զրույցում հայտարարել է Հայաստանի նախագահ Սերժ Սարգսյանը:
Սարգսյանը նշել է, որ Եվրասիական տնտեսական միությանն անդամակցելիս նպատակ կար ավելացնել ապրանքաշրջանառությունը Եվրասիական տնտեսական միության անդամ-երկրների հետ:
«Անցյալ տարի մեր արտահանման աճը Ռուսաստան գյուղատնտեսության ոլորտում կազմել է շուրջ 40 տոկոս: Այս տարի այդ ցուցանիշը մի փոքր ցածր է՝ ավելի քան 35 տոկոս: Մենք Հայաստանում լավ տեմպերով զարգացնում ենք գյուղատնտեսությունը: Ընդհանուր առմամբ պետք է ասեմ, որ գյուղատնտեսությունը մեզ մոտ շատ զարգացած է, բայց ներուժ կա այն ավելի զարգացնելու համար»,- ասել է նա:
Սարգսյանը հստակեցրել է, որ Ռուսաստան արտահանվող ապրանքների թվում կարող են լինել բանջարեղենը, մրգերը, դրանցից պատրաստված պահածոները, պանիրը…
«Եվ այդ ոլորտի (գյուղատնտեսության-խմբ.) առանձնահատկությունը հենց այն է, որ այստեղ մենք ներկայացնում ենք ոչ թե մեկ մոնոպոլիստ-ձեռնարկատիրության (օրինակ՝ լեռնահարստացուցիչ) արտադրանք: Գյուղատնտեսության մեջ մեզ մոտ զբաղված է ավելի քան 350 հազար ֆերմերային տնտեսություն, ուստի եկամուտները բաշխվում են հավասարաչափ: Եվ դա շատ կարևոր է»,- ասել է Սերժ Սարգսյանը:
Պատրաստեց՝ Վիկտորյա ԱՆԴՐԵԱՍՅԱՆԸ
