Մոսկվան մոտ ապագայում Երևանին կտրամադրի գործող համաձայնագրով նախատեսված սպառազինության խմբաքանակը, իսկ արդեն նոր՝ 100 մլն դոլարի վարկային համաձայնագրի իրականացումը կսկսվի բոլոր միջազգային համաձայնությունների ավարտից հետո: Այս մասին «ՌԻԱ Նովոստիի» հետ զրույցում հայտարարել է Հայաստանի նախագահ Սերժ Սարգսյանը:
«Մինչև տարեվերջ մենք կիրականացնենք դեռ նախորդ պայմանագիրը: Այս օրերին մենք սպասում են նոր մատակարարումների, իսկ մինչև տարեվերջ մենք կփակենք նախորդ պայմանագրի հետ կապված բոլոր հարցերը»,- ասել է նա:
Հիշեցնենք, 2015թ. հունիսին Հայաստանի և Ռուսաստանի միջև պայմանագիր էր ստորագրվել 200 մլն դոլարի սպառազինության մատակարարումների վերաբերյալ:
«Մենք արդեն Երևանում ստորագրել ենք նոր պայմանագիր, այն պետք է անցնի հայկական և ռուսական բոլոր ատյանները, հետո՝ վավերացման գործընթացը, իսկ արդեն դրանից հետո մենք կսկսենք աշխատանքները ռուսական կողմի համապատասխան արտադրողների հետ՝ այդ ծրագիրն իրականացնելու համար: Ցավոք, դա այդքան արագ չի ստացվում»,- ասել է Սարգսյանը:
Համաձայնագրի նախագծի համաձայն, որին Հայաստանի կառավարությունը հավանություն է տվել հոկտեմբերի 12-ին, Ռուսաստանը Հայաստանը կտրամադրի պետական վարկ՝ ռուսական արտադրության ռազմական նշանակության արտադրանքի մատակարարումների համար: Հայկական կողմը վարկը կօգտագործի այդ արտադրանքի մատակարարման յուրաքանչյուր պայմանագրի արժեքի 90 տոկոսի ֆինանսավորման համար: Կանխավճարը պետք է կազմի ոչ պակաս, քան պայմանագրի արժեքի 10 տոկոսը:
Համաձայնագրի նախագծում նշվում է, որ վարկը տրվում է 15 տարի մարման ժամկետով՝ 3 տոկոս տոկոսադրույքով:
Պատրաստեց՝ Վիկտորյա ԱՆԴՐԵԱՍՅԱՆԸ
