Առողջական խնդիր ունեցողների մոտ եղանակային փոփոխությունները նկատելի են դառնում՝ սրվում են այն հիվանդությունները, որոնք մինչեւ վերջ չեն բուժվել: Այդպիսի երեւույթներից է հիպերտոնիան՝ արյան ճնշման բարձրացումը, որը ուղեկցվում է անքնությամբ, տհաճ զգացողություններով: Ժողովրդական բժշկությունն այդ դեպքերում առաջարկում է անոթները մաքրող, հանգստացնող մի շարք բույսերից, միրգ-բանջարեղենից պատրաստված բուժամիջոցներ:
Բնաբուժության մեջ հայտնի է, որ իշառվույտը եւ նրա պատրաստուկները մեծացնում են արյունատար անոթների տոնուսը, էլաստիկությունը, ունեն անոթապաշտպան եւ հակաայտուցային ազդեցություն: Ուստի անքնության, հիպերտոնիայի ժամանակ կարող եք 1 թեյի գդալ դեղաբույսին ավելացնել 1 բաժակ եռացրած սառեցրած ջուր՝ սենյակային ջերմաստիճանի: Թրմել 2 ժամ, քամել: Ընդունել 1/4 բաժակից՝ քնելուց առաջ: Հիպերտոնիայի ժամանակ ընդունել 0,5 բաժակից՝ օրը 2-3 անգամ: Ջրաթուրմը ոչ միայն իջեցնում է արյան ճնշումը, այլեւ բարձրացնում է լեյկոցիտների քանակը:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
31.10.2017
