Տավուշի մարզի Նոյեմբերյանի տարածաշրջանում, Դեբեդի հովտում կան բազալտի հանքավայրեր: Սակայն դրանց շահագործելու իրավունք ունեցող գործարարների մի մասը գերադասում է քարի արդյունահանմամբ չզբաղվել, այլ՝ բազալտ ներկրել Վրաստանի Բոլնիսի շրջանից: Դա այն դեպքում, որ Բոլնիսի շրջանի բազալտի հանքավայրերն ավելի աղքատ են, քան Նոյեմբերյանի կամ Լոռու հանքավայրերը:
Պատճառն այն է, որ Վրաստանում բազալտը շուրջ երեք անգամ ավելի էժան է, քան Հայաստանում: Քարի արդյունահանմամբ զբաղվող գործարարները հայտնեցին,որ իրենք Վրաստանի բազալտը ներկրելիս Բագրատաշենի մաքսակետում քարի կշռի հաշվարկով բավական մաքսավճար են մուծում, սակայն արդյունքում Վրաստանի բազալտն ավելի էժան է ստացվում: Դրա պատճառն այն է, որ Վրաստանում արդյունահանվող բազալտի բնավճարը ցածր է:
Քար արդյունահանող նոյեմբերյանցի գործարարի խոսքերով՝ Հայաստանում քարի արդյունահանման համար մուծվող բնավճարը բարձր է, այն գրեթե հավասար է ոսկու արդյունահանման համար գանձվող բնավճարին:
Ըստ գործարարի՝ պատճառն այն է, որ Հայաստանում շահագործվող ոսկու հանքերի տերերը իշխանության հետ կապված մարդիկ են: Արդեն տեւական ժամանակ Հայաստանը հարեւան Վրաստանից բազալտ է ներմուծում:
Ոսկան ՍԱՐԳՍՅԱՆ
