«Իգլա»-ի գործով դատական նիստում այսօր դատավարության կողմերը հարցեր ուղղեցին գործով ՊՆ փորձագետ Հասրաթյանին, որը փորձագիտական եզրակացություն էր տվել «Իգլա»-ի առնչությամբ:
Հիշեցնենք, որ ԼՂՀ պաշտպանության նախկին նախարար Սամվել Բաբայանին մեղադրանք է առաջադրվել այն բանի համար, որ նա դրդել է մի խումբ անձանց (ամբաստանյալներ Սանասար Գաբրիելյան, Արմեն Պողոսյան՝ հայտնի որպես «Ժորիկ», Կարեն Քոչարյան, Անդրանիկ Քոչարյան, Ժորա Զաքարյան, Դավիթ Հարությունյան) ապօրինի կերպով «Իգլա» տեսակի դյուրակիր զենիթահրթիռային համալիր ձեռք բերելուն, փոխադրելուն և պահելուն:
Հասրաթյանը նշեց, որ գործով որպես ապացույց առկա «Իգլան» կարելի է օգտագործել ըստ նշանակության, եթե այն համալրվի պակասող մասերով. այն չունի արձակման մեխանիզմ եւ վերգետնյա սնուցման բլոկ: Սամվել Բաբայանը հարցրեց՝ նման վիճակում այն համարվո՞ւմ է ռազմամթերք: Փորձագետը պատասխանեց, որ «այո, այն հանդիսանում է սպառազինության մասնիկ»: Սամվել Բաբայանն առարկեց՝ կրկնելով դատարանում մինչ այդ ասածը. «Նման վիճակում «Իգլան» վտանգավոր չէ»:
Հասրաթյանն էլ հավելեց, որ այն միայն որոշակի պայմաններում կարող է պայթել, օրինակ՝ մարդկային գործոնի ազդեցությամբ, քանի որ պայթյունավտանգ նյութ է պարունակում:
Լուիզա ՍՈՒՔԻԱՍՅԱՆ
