Aravot.am-ը ճարտարապետ Սաշուր Քալաշյանից հետաքրքրվեց` ինչ կարծիքի է Գուրգեն Մուշեղյանի` աղմուկ հանած առաջարկի վերաբերյալ, ըստ որի՝ ճարտարապետն առաջարկում էր քանդել օպերան, տեղում կառուցել էստակադա` տրանսպորտային խցանումների եւ փողոցների գերծանրաբեռնվածության հարցը լուծելու համար:
«Գուրգենը (Գուրգեն Մուշեղյանը-Գ.Հ) նկատի չի ունեցել օպերայի շենքը քանդելը, այդտեղ թյուրիմացություն կա…Այո, ինքն առաջարկություն արել է, բայց խոսքն այլ բանի մասին է: Նկատի ունի` օպերայի մոտի Ֆրանսիայի հրապարակը քանդվի եւ ստեղծվի ստորգետնյա անցում, դա օպերայի շենքի հետ կապ չունի: Այդ նախագիծը մշակած քննարկել ենք քաղաքապետարանում: Օպերայի դիմացում, որտեղ խաչվում են Սայաթ-Նովան եւ Մաշտոցի պողոտան, պետք է կամ Սայաթ-Նովան մտնի գետնի տակ կամ էլ Մաշտոցի պողոտան…Խաչմերուկն, ըստ էության, պետք է իջնի ներքեւ, վերեւի մասում էլ երեք այգիները միանան: Խոսքը հետեւյալ այգիների մասին է` մեկն այն է, որտեղ նկարիչների վերնիսաժն է` Սարյանի արձանով, մյուսն այն այգին է, որտեղ Սայաթ -Նովայի արձանն է, եւ երրորդը այն է, որտեղ Թամանյանն է: Այդ երեք այգու կտորներն ըստ նախագծի միանում եւ մեկ այգի են դառնում…Այնպես որ, օպերան քանդելու ծրագիր չի եղել եւ չկա, եւ Գուրգենն էլ դրա հետ կապ չունի …Իմիջիայլոց, նշված նախագիծը վաղուց էսքիզային վիճակով քննարկվել է եւ հավանության է արժանացել, մնում է, որ կառավարությունը դրա անհրաժեշտությունը զգա եւ միջոց գտնի սարքելու»,-նշեց ճանաչված ճարտարապետը:
Հայաստանի ճարտարապետների միության նախագահ Մկրտիչ Մինասյանը եւս պնդում է, որ Գուրգեն Մուշեղյանը օպերայի շենքը քանդելը նկատի չի ունեցել: Նա գտնում է, որ աղմուկի պատճառը ասելիքն անհաջող ձեւակերպելու պատճառով է ծագել: «Թյուրընկալումը եւ սթրեսը մարդուն կարող են ինֆարկտի հասցնել: Տարօրինակ բան կլիներ, որ ինքը նման առաջարկ աներ: Ինքը ուրիշ բան նկատի ուներ, ձեւակերպման խնդիր է… Իսկ ընդհանրապես Գուրգեն Մուշեղյանը միշտ անհանգստություն է ունեցել, որ փողոցները ծանրաբեռնված են եւ կայանատեղիներ չկան»,-ասաց Հայաստանի ճարտարապետների միության նախագահը:
Գոհար ՀԱԿՈԲՅԱՆ
Այսօր, շատերի համար է օպերան տեղանուն, այլ ոչ թե արվեստի օջախ …