ՀՀ ԱՆ քրեակատարողական հիմնարկներում եւ մարմիններում հասարակական վերահսկողություն իրականացնող դիտորդների խումբն այսօր ներկայացրեց 2016 թվականի գործունեության հաշվետվությունը:
Արդարադատության փոխնախարար Սուրեն Քրմոյանի խոսքով, իրենք փորձում են հաշվի առնել դիտորդական խմբի կողմից ներկայացված խնդիրները: «Հիմնական խնդիրը, բողոքների 48,3 տոկոսը քրեակատարողական հիմնարկներում առողջապահական ծառայությունների մատուցումն է: Ըստ այդմ՝ կառավարությունը ճիշտ է թիրախավորել այս ոլորտը, կառավարության գերակա ուղղությունների ծրագրով այս տարի բժշկական ծառայությունների արդիականացումը դիտարկվել է որպես գերակա ուղղություն»,- այսօր դիտորդական խմբի գործունեության հաշվետվության ներկայացման ժամանակ ասաց Սուրեն Քրմոյանը:
Ըստ նրա՝ ՔԿՀ-ների բուժանձնակազմի համար արդեն անցկացրել են վերապատրաստման դասընթացներ. «Արդեն 11 քրեակատարողական հիմնարկ հագեցվել է գերժամանակակից սարքավորումներով, քրեակատարողական ծառայողները նույնպես վերապատրաստվել են, որ առաջին բուժօգնության հետ կապված լուծումներ ունենան»:
Փոխնախարարի խոսքով, իրենք նաեւ հոգեբանական ծառայությունների մասով էլ են քայլեր արել, վերապատրաստվել են նաեւ ՔԿՀ-ների հոգեբանները. «Իհարկե, բավարար չեն կատարված աշխատանքները, դեռեւս շատ անելիքներ ունենք: Նախորդ զեկույցում խոսում էինք դատապարտյալի պահման պայմաններից, քրեակատարողական հիմնարկների գերբնակեցման խնդրի մասին, արդեն որպես կայացած փաստ՝ ներկայացնում ենք խցերի, տարածքների վերանորոգման, արեւային էներգիայով ջերմային պայմանների ապահովման մասին»:
Փոխնախարարը նկատեց նաեւ, որ ՔԿՀ-ներում սննդի ապահովման մասով խնդիրներ ունեն, հարցվածների 3,4 տոկոսն այս խնդրի մասին են բարձրացնում. «Նախորդ տարի էլ է արձանագրվել, որ հատուկ ուշադրության կենտրոնում են երեխաները, կանայք, հոգեբուժական հիվանդություններով տառապողները, հատուկ կարիքավորները»:
Նա ասաց, որ լուծելու են նաեւ ՔԿՀ-ներ արգելված իրերի թափանցումը. «Ինչ ենք դիտարկում, առաջին՝ հանձնուքների ինստիտուտի կանոնակարգումն է, լուծելով սննդի խնդիրը՝ հնարավորություն կունենանք նաեւ բացառել սննդամթերքը որպես հանձնուք փոխանցելը, կբացառենք նաեւ արգելված իրերի ներթափանցումը»:
Ըստ Սուրեն Քրմոյանի՝ դատապարտյալների համար նախատեսված է ապահովել կապի լրացուցիչ միջոցներ. «Հուսով եմ, որ մինչեւ տարեվերջ տեսազանգի հնարավորություն կունենանք ՔԿՀ-ներում ու փուլային եղանակով կներդնենք այն դատապարտյալների համար, որոնց հարազատներն արտասահմանում են»:
Արփինե ՍԻՄՈՆՅԱՆ
