Նորություն ասած չեմ լինի, եթե փաստեմ, որ ֆեյսբուքը միայն լուսանկար հրապարակելու եւ բարեւ-բարիլույսի վայր չէ: Սոցցանցերը տեղեկատվության աղբյուր են, տեղեկատվությունը տեղ հասցնելու հրաշալի հարթակներ: Հակապես «ֆեյսբուքի վրա նստած» երիտասարդությունը հենց այդ ցանցից է տեղականում, թե օրինակ` ինչ մրցույթներ, աշխատանքի տեղավորվելու, վերապատրաստվելու, ինչ-ինչ ծրագրերի մասնակցելու հնարավորություններ, բրենդային խանութներում զեղչեր կան, կամ ինչպես կարող է կապվել այս կապ այն բջջային օպերատորի ներկայացուցչի հետ, որովհետեւ բոլորը ներկայացված են ֆեյսբուքում:
Եվրոպական Միության՝ Արևելյան գործընկերության «Մշակույթ և ստեղծարարություն» ծրագրի շրջանակում եւս անվճար առցանց 14 դասընթաց կարելի է գտնել՝ մշակույթի կառավարիչների համար: Եվ դրա համար բավական է, որ մշակութային և ստեղծարար ոլորտների մասնագետները մասնակցեն «Մշակույթ և ստեղծարարություն» ծրագրի կողմից մշակված և եվրոպացի փորձագետների կողմից դասավանդվող առցանց դասընթացներին՝ Ռազմավարության մշակում, Շահերի պաշտպանություն և Ստեղծարար Եվրոպա թեմաներով, համապատասխան թեստ հանձնելուց հետո էլ վկայական ստանան:
Ընդ որում, դասընթացները հասանելի են ութ լեզվով և ներառում են ոլորտում եվրոպական լավագույն փորձը։ Անձամբ ես, բոլոր դասընթացներին մասնակցել եմ, համապատասխան գիտելիքներ ձեռք բերել եւ ստացել վկայականներ: Նույնը խորհուրդ եմ տալիս իմ գործընկերներին, ուսանողներին եւ բոլոր այն մարդկանց, որոնք աշխատում են մշակութային եւ ստեղծարար ոլորտներում: Կարծում եմ՝ հավելյալ գիտելիքը, այն էլ անվճար տրվող, հաստատ որեւէ մեկին չի վնասի:
Նշեմ նաեւ, որ դասընթացին մասնակցելու և վկայական ստանալու համար ընդամենը պետք է ընտրել նախընտրած թեման՝ ծրագրի կայքէջում https://www.culturepartnership.eu/en/publishing/online-learning, ուսումնասիրել դասընթացի նյութերը և ճիշտ պատասխանել թեստի հարցերին։
Ի դեպ, Մշակույթ եւ ստեղծարարություն ծրագիրն ինձ շատ օգնեց, ես դարձա ծրագրի գործընկերը՝ պատրաստելով 10 հրապարակում: Ստացածս փորձն էլ օգնում է լրագրողական աշխատանքում, նաեւ դասավանդելիս:
Գոհար ՀԱԿՈԲՅԱՆ
Լուսանկարը՝ https://www.neomedia.am կայքից:
