Արագածոտնի մարզի Իրինդ համայնքում (Թալինի տարածաշրջան) գտնվող 7-րդ դարի եկեղեցին՝ Սուրբ Աստվածածինը(Սուրբ Գեւորգ), 12 տարի է՝ պետական միջոցներով վերականգնվում է: Նախկին տեսքը վերագտնելու ճանապարհը բարդ է եղել. նախ, վարչապետ Անդրանիկ Մարգարյանի մահից հետո եկեղեցու վերականգնման գումարների մութ «ճակատագրի» մասին բարձրաձայնվեց, հետո՝ մասնագիտական եւ ֆինանսավորման պակասի խնդիրներ առաջացան:
Այսօր, սակայն, քիչ բան է մնացել. մինչեւ տարեվերջ իրինդցիներն ակնկալում են սիրելի եկեղեցին ամբողջությամբ վերականգնված տեսնել: Սակայն եթե ջերմաստիճանը +5-ի հասնի, պետական միջոցներով(այս տարվա համար մոտ 27 միլիոն դրամ) շինարարությունը կդադարեցվի:
«Սա եզակի հուշարձան է՝ բոլորակ, բազմախորան տիպի եկեղեցի: Նմանօրինակ մեկ այլ եկեղեցի կա Եղվարդում, որը վերականգնված չէ»,-այսօր Իրինդ այցելած լրագրողների հետ զրույցում ասաց վերականգնող-ճարտարապետ Մերի Դանիելյանը, նաեւ՝ կատարված աշխատանքների մասին պատմեց Մշակույթի նախարար Արմեն Ամիրյանին: Դանիելյանը տեղեկացրեց, որ մնացել են եկեղեցու տանիքածածկույթի, դուռ-պատուհանների տեղադրման եւ հատակի՝ վերջնական տեսքի բերման աշխատանքները:
Շինարարական կազմակերպության ներկայացուցիչները վստահեցրին՝ թեեւ հավանական է, որ ցուրտ եղանակը կխանգարի, կաշխատեն այս տարի եկեղեցու վերականգնումն ավարտել:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
