Հոկտեմբերի 24-ին Կենտրոն եւ Նորք-Մարաաշ վարչական շրջանների ընդհանուր իրավասության դատարանում հանդես գալով մեղադրական ճառով՝ դատախազ Մարտին Նալբանդյանը Դավիթ Սիմոնյանի համար պահանջեց ազատազրկում երեք տարով եւ միջնորդեց, որպեսզի նրա խափանման միջոցը փոխվի կալանքով:
Մեղադրողը հաստատված համարեց մեղադրանքը, համաձայն որի՝ 21-ամյա Դավիթն «իր մոտ չունենալով ՀՀ քաղաքացու անձնագիր, 2017թ. ապրիլի 2-ին ՀՀ Ազգային ժողովի ընտրություններին մասնակցելու նպատակով, եղբոր` Գոռ Սիմոնյանի հետ այցելել է Երեւանի Թոթովենցի անվան թիվ 57 դպրոցում տեղակայված թիվ 9/53 ընտրատեղամաս, որտեղ Գ. Սիմոնյանին խնդրել է սպասել ընտրատեղամասի մոտ, իսկ ինքը վերցնելով վերջինիս՝ ՀՀ քաղաքացու անձնագիրը, մուտք է գործել ընտրատեղամաս, եղբոր անձնագրով գրանցվել ընտրողների ցուցակում եւ քվեարկել է մեկ այլ անձի` Գ. Սիմոնյանի փոխարեն»:
Դավիթ Սիմոնյանն ու նրա պաշտպանը՝ Հանրային գրասենյակի փաստաբան Անժելա Հոբոսյանը պաշտպանական ճառերով հանդես կգան դեկտեմբերի 1-ին:
Մինչ օրս դատական հինգ նիստ է տեղի ունեցել դատավոր Գագիկ Պողոսյանի նախագահությամբ: Ի դեպ, նույն այս դատավորի դատավճռով Դավիթը մեկ այլ քրեական գործով՝ Բաքվում ապաստանած Վահան Մարտիրոսյանի, արդարացվել էր, մեղադրողը դարձյալ եղել էր Մ.Նալբանդյանը: Վերջինիս դատական նիստերից մեկի ժամանակ պաշտպանական կողմը բացարկ էր հայտնել, քանի որ վերաքննիչ դատարանում բեկանվել էր նախորդ գործը եւ Դավիթը մեկ ամսով ազատազրկվեց մեղադրողի պահանջով:
Դավիթն «Առավոտի» հետ զրույցի ժամանակ ասաց, թե շփոթմամբ է վերցրել եղբոր անձնագիրը, եւ «մատնիչ սարքն» է բացահայտել, որ կա երկրորդ անգամվա քվեարկություն:
Նա իրավաչափ չի համարում դատախազի պահանջը եւ գտնում է, որ չի կարող իր անզգուշությունը պատժվել ազատազրկմամբ:
Նա մտադիր է մինչ պաշտպանական ճառը բողոքի ցույցի դուրս գալ:
Ռ. Մ.
«Առավոտ»
27.10.2017
